سهام البارودي – كود//

مع هادشي لي طرا مؤخرا فديكاطلون ففرانسا ! و حتى قبل ! كنت كانسمع بزاف داك السؤال من عند الاسلاميين ديال ” وا نتوما كادافعو على الحريات الفردية و لكن فاش كاتوصل القضية للنقاب و لا الحجاب كاضربو الطم ” و فاش كاتنوض شي دولة فحال فرانسا تمنع الحجاب فالمدارس و الادارات العمومية كاينوضو يتغاوتو ” واك واك فيناهي الحرية الفردية لي كايتغناو بيها العلمانيين ! واك واك علاش كادافعو غا على العرى و الصايات و ماكادافعوش على خواتاتنا المتحجبات ! المنقبات ”

و طبعا بنادم كايمشي فالتفكير ديالو بعيد و فهامتو كاتصور ليه انه هادشي داخل فالحرب على الاسلام حيت دين واعر و الناس ديالو متفوقين اقتصاديا و سياسيا و عسكريا…

لي ماعارفينش هاد الناس ! انه مسألة أنه مرا تغطي راسها راه ماشي حرية فردية يقدر واحد كايحشم على عاراضو يدافع عليها ، حيت مافيها مايدافع عليها، حيت اصلا مسألة مبنية على فكرة باطلة ديال انه المرا عورة خاصها تستر باش ماتنوضش الفتنة بين صفوف المسلمين ! واش نتا مسطي باغي تفسر لفرانساوي هادشي ؟ تقوليه راه العيالات عندنا خاصهم يتغطاو باش …. آش كاتخربق آولد عمي !

شتي هاد الفكرة بالضبط ديال المرا خاصها تغطا هي بالضبط مربط الفرس! غاتقوليا واااااهي بغااات ! هي رااااضية ! هي مقتنعة ! غانقوليك بلي دوك الناس كايشوفو ابعد من هي بغات ! هي بغات شنو ؟ هي بغات تعتابر راسها نصف انسان ؟ خاصها تغطي راسها و تلبس لباس معين باش ماتحركش الغريزة ديال سيدي و مولاي الذكر ؟ راه هاد التفكير القروسطي لي مايمكنش يتقبلوه ليه ناس متنورين ! خصوصا فبلاد فحال فرانسا!

ثم الحجاب ماشي حرية ! ماشي حرية ! حيت توسامبلومو كانهضرو على الحرية فاش كايكون عندك اختيار بين جوج ديال الحوايج او اكثر ! الحرية انك تلبس الصاية و تلبس التشادور و تختار نتا عن نفسك تلبس التشادور ! الحرية انك تاكل. التفاح و لا البنان و تختار البنان ! الحرية انك تتزوج و لا تبقا عازب و تختار تتزوج ! هنا كانهضرو على الحرية ! آشمن حرية عند العيالات اليوم لي دايرين الحجاب ؟ ياك الدين كايفرض عليهم يسترو راسهم و كاينة آية متافقين عليها بزاف ديال الفقها انها هي لي خاصها تكون فيها انه المرا خاصها تغطي شعرها !

فين كاينة الحرية و الدين كايقوليك يا تتحجبي يا تسناي العقاب ديال الله ؟  آشمن حرية و كاينين عيالات كتياكلو العصا و كايتحرقو بالما القاطع و كايتعذبو من عند واليديهم و ازواجهم و جيرانهم فبزاف ديال البلدان فالعالم باش يتحجبو ؟ الحجاب مفروض مافيهش حرية  اختيار !

ثانيا واخا ماكايناش اولا ! الحجاب ماشي لبيسة آلامود ! ماشي هوا الدجين و لا التيشورت و لا الصاية ! و مايمكنش ليك دير مقارنة بيناتهم و تغوت واك واك كايدافعو على الصاية و ماشي الحجاب !  الحجاب كايخبي موراه ايديولوجية دينية كاتشوف المرا ككائن أقل من الراجل ! كائن عورة ! كائن كايفتن عباد الله و كايخرج على الأمم !

هاد جوج ديال الاسباب كافيين باش دولة فحال فرانسا ماتبغيش تشوف الحجاب و تخليه يسرح فالمجتمع ديالها ! راه فرانسا هاديك آ صاحبي ! كوميم ! مهد الحريات و بلد الانوار ! بلد ” الانسان” مرا و راجل فحال فحال ،آشمن حجاب و لا نقاب الله يهديك !