عفراء علوي محمدي- كود//

تعرض الفيلم المغربي “الزنقة كونطاكت” للمخرج إسماعيل العراقي، الأحد اللي فات، فمهرجان البندفية السينمائي فإيطاليا فالدورة ديالو ال77.

وقالت الممثلة خنساء باطمة، الي خدات دور البطولة فالفيلم، أنها مستطعاتش تحضر هي ومجموعة من الزملاء ديالها للعرض الأول دالفيلم فالمهرجان بسبب فيروس كورونا، لكن فالمقابل حضر المخرج العراقي، والممثلين أحمد حمود وسعيد باي وطاقم الفريق التقني.

وقالت باطمة، فتصريحها لـ”كود”، أنها مازال ماشافتش الفيلم ومازال ما كونات عليه حتى شي انطباع لحد الساعة، وماستاطعاتش تشوفو بسبب ظروف الوضع الوبائي.

وفحفل العرض فالمهرجان، الممثل باي لبس فيست فيها راية المغرب من الداخل، وختار يحلها باش تبان مزيان فالتصويرة اللي خدا مع المخرج وحطها ف”استكَرام” ديالو وقال: “الحماق من بعد عرض الفيلم مع فريق العمل”.

والفيلم اللي من بطولة باطمة وباي وفاطمة عاطف ومراد الزاوي، تعرض كذلك فمجموعة من القاعات السينمائية ف5 و6 و7 فهذ الشهر، ضمن فعاليات “آفاق” الخاصة بدورة هذ المهرجان، وكيتميز بكونو تصور بتقنية 35 ملم، وكتدور أحداثو حول موسيقى الروك المغربية فالسبعينات.

وشاركو فهذ المهرجان، اللي داز فظروف استثنائية بسبب كورونا، 18 فيلم كيتنافسو على جائزة “الاسد الذهبي” كأفضل فيلم باسم دورة المهرجان هذ العام، ومنهم الفيلم المغربي.