عفراء علوي محمدي- كود//

مسلسل “ياقوب وعنبر” تعرض للقرصنة. كاين اتهام لمسلسل “شهادة ميلاد” اللي داروها السواعدة فقناتهم “ام بي سي 5” بسرقتو. هاد الشي بدا بالتدريج. القضية وصلات للمركز السينمائي المغربي. بغاوه يبحث فالموضوع ويشوف واش السيناريو مشفور ولا اللا. من بعد غاديين يدوزو للقناة. ممكن جدا يوصلو للقضاء من بعد.

“عنبر وياقوت” مسلسل كتباتو السيناريست والممثلة المعروفة سامية اقريو ونتجابو “ديسكونيكتد” تصدمو باش شافو التشابه الكبير فالأحداث ديال المسلسلين بجوج.

خالد النقري، مدير شركة إنتاج “ديسكونيكتد”، اكد ل”كود” باللي الشركة وضعات لبارح بسيناريست “شهادة ميلاد”، واللي كيقول أن الهوية ديالو مشكوك فيها، بحكم أن الاسم اللي كيطلع فالجينيريك ديال المسلسل إسم ثلاثي مجهول (محمد عيسى العفاز)، والمخرجة إلهام العلمي فتصريح سابق ليها اعترفات بللي ماكتعرفش هذ السيناريست، “شي اللي كيبان لي مستحيل بحكم أنها المشرفة الاولى على إعداد العمل، والاسم يقدر يكون اسم مستعار”، على حد تعبيرو.

واستحضر النقري، فتصريحو ل”كود”، تصريح آخر كانت دلات بيه الممثلة فاطمة خير، بطلة المسلسل اللي كان كيدوز فرمضان، وتكلمات على اسم آخر للسيناريست، وهو كذلك اسم غير معروف فالساحة، وهذا كيعني حسبو أن من المرجح كاتب قصة “شهادة ميلاد” مايكونش أصلا.

وقال بللي من الممكن السيناريو يكون تسرب بطرق مختلفة، خصوصا وأنه داز من مجموعة من المراحل من سنة 2017 فاش تصاوب، “وممكن تكون خرجات نسخة منو من المطبعة مثلا، أو عن طريق شركة إنتاج كانت تبناتو قبل”، على حساب كلام النقري.

وللإشارة، فمسلسل “عنبر وياقوت”، اللي بثاتو القناة الأولى، حققى نجاح كبير ونسبة مهمة من المشاهدات فهذ رمضان، بحيث حصد 10 مليون مشاهدة يوميا.

وكانت السيناريست أقريو عندها رغبة باش تمثل فيه دور مهم، لكن تزامن تصويرو مع تصوير مسلسل “باب البحار” اللي حتى هو قامت بالكتابة ديالو ومثلات فيه.