مصطفى الشاذلي – كود سبور//

وحيد خايلوزيتش، الناخب الوطني، خرج ليها فاص، وگال أن المنتخب الوطني ماغاديش يتأهل لكأس العام بقطر 2022.

هادشي صرح بيه بعد الماتش، لي فاز فيه المنتخب المغربي على النيجر بواحد لزيرو في ملعب مراكش، استعدادا للاستحقاقات المقبلة.

المدرب البوسني فاجأ الصحافيين في الندوة الصحافية بهاد الصراحة “مانكدبوش على راسنا إلا بقينا هاكا ما نتأهلوش، مازالين بعاد وخاص الخدمة بزاف”.

واخا المنتخب ربح الماتش كونتر النيجر، إلا أن المدرب خاليلوزيتش ماراضيش بالنتبجة، واحد لزيرو مقنعتوش، كيفما مقنعوهش اللعابة، لي لعبو.

وأكد المدرب البوسني أن اللعابة ضيعوا بزاف ديال الفرص، “كتنقصهم النجاعة والفعالية قدام الشبكة واخا لعبت لعابة جداد باش نشوف مستواهم الفني والبدني قبل ما نحكم عليهم”.

خاليلوزيتش عجبو الكارتي بزاف، وگال عليه “عجبني هاد اللعاب ماركا بيت وكان بإمكانه يماركي أهداف أخرى، هو مزيان من الناحية التكتيكية ويمكن يطور مستواه أكثر، خاصة من ناحية السرعة”.

واضاف المدرب البوسني أن المنتخب المغربي يمر بمرحلة صعبة ولا بد من تظافر الجهود، وتكلم كذلك على لعابة البطولة، وگال: انا ماكنعرفهومش بزاف، خاصني نتابع الماتشات ديال البطولة باش نشوف مستواهم، سمعت فقط على تألق الفرق المغربية في المسابقات الإفريقية.

وبخصوص قضية عبد الرزاق حمد الله، هداف النصر والدوري السعودي، أكد خاليلوزيتش أنه ما كيعرفوش بزاف وماكانتش عندو الفرصة باش يتابعو من قبل، واضاف “سمعت انه مشا من الكونصونتراسيون قبل الكان ديال مصر.. يمكن لي نعطيه فرصة أخرى، ما عرفتش فوقاش، لكن غادي نشوفو بالتأكيد وإلا عجبني غادي نعيط عليه باش يكون معانا مستقبلا”.