كود – وكالات //

دخلات السباحة الأسترالية “إيما ماكيون” (Emma McKeon)، التاريخ من بابو الواسع، وولات أول سباحة كاتربح 7 ميداليات فـ دورة أولمبية واحدة فالتاريخ، وثاني مرا كاتاخذ 7 ميداليات فنسخة أولمبية وحدة، فإنجاز ماتحققش فحتى شي رياضة خرى من هادي 69 عاما.

وحصلات السباحة، اللي عندها 27 عام، على 4 ذهبيات، بحيث خدات جوج فكل من سباق 50 و100 متر حرة خلال منافساتها في أولمبياد طوكيو 2020 المقامة حاليا فاليابان، كيف خدات 3 ميداليات برونزيات.

وفتعليقها على هاد الإنجاز التاريخي، قالت ماكيون: “مازال عندي شعور بأني كانحلم. ماعمرني توقعت ناخذ جوج ذهبيات فـ فترة وحدة… أنا فخورة بزاف براسي”.

وزادت: “تربيت كانتفرج فـ السباحة والرياضيين كايديرو حوايج زوينين فـ أستراليا، وأنا كنت بغيت ندير حاجة مشابهة… هادشي جاني بحال شي حلم”.

وقالت أن الإنسان إيلا خدم بجدية واستمتع بشنو كايدير وحاول يحقق حلمو، من السهل يولي جزء من هاد الرياضة، ويمكن توقع حاجة زوينة.

وكررات البطلة الأسترالية إنجاز السباحين “مايكل فيلبس” و”مارك سبيتز” و”مات بيوندي” فـ الفوز بـ7 ميداليات فدورة واحدة للألعاب الأولمبية.

ويشار إلى أن السباح الأمريكي، مايكل فيلبس، رقم قياسي بحصد 8 ميداليات في أولمبياد أثينا 2004، وأولمبياد بكين 2008.

وأصبحت “إيما ماكيون” ثاني امرأة، بعد لاعبة الجمباز السوڤياتية “ماريا كَوروخوفسكايا”، اللي كاتفوز بـ7 ميداليات في نسخة واحدة من الألعاب الأولمبية، وكانت خداتهم كَوروخوفسكايا فأولمبياد “هلسنكي 1952” فـ فنلندا.