ميريكانية عندها 8 سنين ولات نجمة بسباب مرض نادر.. وهادي هي القصة ديالها
سهام البارودي – كود//
شهر اوكتوبر معروف فالعالم كامل بأنه شهر التعريف بواحد من الامراض لي كايصيبو العيالات بشكل كبير و لي هوا سرطان الثدي ! الكونصير ديال البزولة ! اكثر كونصير كايتعرضو ليه العيالات و لي الحمد لله العلاج ديالو متوفر الآن فالمغرب خاص غير الانسان يدير الفحص المبكر باش يتفادى الصعوبات !
فهاد الشهر بزاف ديال الاذاعات و البرامج كايناقشو الكشف المبكر لسرطان الثدي و حتى المؤثرين فالعالم كامل فئة مهمة كاتشارك بالتحسيس عبر القنوات ديالها.
فالمغرب عدد كبير ديال العيالات كايتصابو بالسرطان كل عام و خصوصا سرطان الثدي و بزاف منهم كايوصلو لمرحلة متقدمة من السرطان عاد كايمشيو للطبيب داكشي علاش كايتعرضو لصعوبات كبيرة فالعلاج و نسبة منهم كاتموت للاسف ! هاد الصعوبات فالعلاج يمكن التفادي ديالها بالكشف المبكر داكشي علاش من المهم انه ولو مرة وحدة فالعام كل مرأة عندها ثلاتين عام الفوق تمشي دير الفحص ديال البزولة عند الطبيب ! مرة وحدة فالعام ماشي شي حاجة كبيرة و كاتخليك تبقاي مرتاحة و بزولتك مرتاحة و كلشي مرتاح
هاد الموضوع مهم و لكن حتى شي يوتوبوزة و لا شي انستاغراموزة و لا شي تيكطوكوزة ماهضرات عليه مع العيالات لي متبعينها ! هيام سطار و فتيحة روتيني اليومي و اسماء بيوتي و ندى حاسي و الطبقة هادو مقابلين غي اليوم غانعري سوتي و نصبن ليكم زربية فالسطح ! السلام حباباتي اليوم تناتفت مع عگوزتي ! آجيو تشوفو القصارة لي دارت ليا صاحبتي باللعابات ! حتى شي مؤثرة د النم ماواعية اصلا بالمرض عاد توعى ليك هي بالتحسيس و بالفحص المبكر ! اغلبهم ضحايا الهدر المدرسي و قلة الشي ! كونصونطراسيون ديال الفقر و الكالاخ و الأمية ماغاتعطيكش مؤثرات كايهتموا بمواضيع فحال سرطان الثدي لي كايقتل بزاف ديال العيالات كل عام ! غاتعطيك مؤثرات باغين يجمعو اكبر قدر د الفلوس عبر الادسنس واخا يعريو عليه سوتهم فاليوتوب ! و يموت لي بغا يموت و يعيش لي بغا يعيش!