محمد سقراط-كود///

عائلة وحدة محتلين الطوندونس المغربي، حمد شرا طوموبيل من بعد مكان عندو والو وخدام غير فصالون واليديه، فيديو لأخت حمد وصاحبة حمد وبنت حمد ومرة حمد لي هي لي صنعات حمد أصلا، وحمد غير مريح وفرحان بالرزق لي جابو الله من خلال فيديوات ديال روتيني اليومي وغسلت رجلين راجلي،( عاد من بعد عرفنا أن خدمتها هاديك)، وشوفو كيفاش قاديت كوزينتي، وشوفو شنو وجدت للغدا، شوية كتسمع الألاف ديال الناس تجمعو فقنيطرة باش يحضرو للإفتتاح صالون ديال شي وحدة من مشهورة فيوتوب، شوية بدا ضريبة الشهرة والخصام مع العائلة والقصف العشوائي مخلاو في بعضياتهم غير لي نساو، حتى فجأة كنلقاو العائلة كلها مستفة فالطوندونس محتافلة بطوموبيلة حمد، وحتى واليديه لي سخطو عليه ومخلاو ماقالو فيه وماقال فيهم محتافلين معاه كأن شيئ لم يكن، نهاية سعيدة لمخاصمة داخل عائلة مغربية.

الموشكيل هو هادشي كاين فالطوندونس حيت كيشوفوه المغاربة ومتبعينو وعاجبهم ومع ذلك كالسين كينتاقدو الطوندونس لي هوما صنعوها بيديهم، راه حتى العالم مافايتنا بوالو من غير الدول لي الإقتصادات ديالها محركة وقوية والمواطنين عندهم قدرة شرائية مزيانة هادو غادي تلقى مواقع البيع والشرا والإشهارات ديال المنتوجات والخدمات وعايشين الحياة ومستغلين الأنترنيت للهدف لي تدار ليه أصلا، أما حنا لي ماعايشينش الحياة كما يجب مكتفيين غير بمشاهدة حياة الآخرين، وكون غير شي حياة نيت نيت، بنادم كيقلب غير على الفقر والحزقة والمشاكيل والهموم والشكوى والمآسي والعاهات والتشوهات الخلقية ويبقى ينفخ فيهم بالتشجيع والهدرة وملي يوصلو ويديرو لاباس يبدى عليهم بالسبان والمعيور ويولي حاسدهم وحاس براسو قولبوه في داك جيم ديالو وجوج مشاهدات لي دار وبيهم دارو الفلوس ومقصموش معاه.

الناس عندهم عائلة كاردشيان لاباس عليهم زوينين عايشين الحياة لي كيحلمو يعيشوها، وحنا عندنا مي نعيمة مي حادة خالتي زهرة ها لي عندها غير عين ها لي حاجب كيغمز بوحدو النص ديال الفم طايح يالله فاتو ربعين عام ودايرات بحال الى قربو لتمانين، وحتى دوك لي مدورات الصرف كتلقاهم حتارفو في الدوري الخليجي جمعو شوية وجاو دارو كوافورات وباقين مبليين بالبيع والشرا والهموز السيدة كتوصلها حوالة مضخمة وتلقاها كتبيع البيجامات والقويلبات والباقي بايعين حياتهم ومعاناتهم ومن بعد كيبيعو سعادتهم ورا الترفيحة من اليوتوب، هذا هو الطوندونس الطبيعي لي غادي يكون عند شعب مكيعيش الحياة ومأكد أنه عمرو غادي يعيشها لذا يمشي يشوف مقود منو باش ينسى حالتو حتى دير لاباس ويبدى يسبو .