علي الصافي – كود العيون ////

اعلان ناصر بوريطة وزير خارجية المغرب القطيعة مع الصبليون اليوم عبر وكالة ايفي جا بعد ساعات من اتصال هاتفي دارو نفس الوزير مع كاتب الدولة فالخارجية الامريكية.

واخا بيان الخارجية ديالنا ما هدرش على قضية الصحرا فموقع “اكسيوس” الاخباري الامريكي قال باللي المسؤول الامريكي قال لبوريطة راه ادارة بايدن ما غادياش تتراجع على الاعتراف بمغربية الصحرا.

بايدن طلب من لمغاربة يستمرو فالحوار مع ناس البوليساريو وباش تبقى الامم المتحدة تلعب هاد الدور. المغرب باش ضمن هاد الشي دخل فالصبليون طول وعرض. بوريطة قال لهاد البلاد اليوم اختارو اما مصالحكم معانا او ابراهيم غالي زعيم البوليساريو اللي دخل عندكم بباسبور جزائري مزور وهو متابع فقضايا كثيرة فيها التعذيب والاغتصاب ….

بوريطة لقاها مناسبة باش يصفي حساباتو مع الصبليون. انتقد رغبتها فالتعاون مع المغرب فالارهاب والهجرة ولكن كتعطيه بالظهر وكتمشي عند خصومو: الجزائر والبوليساريو.

الرباط ما بقاتش حيط قصير يعرف خبار دخول زعيم البوليساريو من الصحافة فالوقت اللي رفضات المملكة كل تعاون مع الانفصاليين الكاطالان.

اذن كاينة اتهامات وتحذيرات واضحة. دابا المغرب وقف تعاونو الامني فمحاربة الارهاب. وقف تعاونو فمحاربة الهجرة.

الرباط حددات مطالبها: الوضوح. يوضحو كلشي. يوضحو علاش دخل ابراهيم غالي للصبليون وما تخبروش. وعلاش وعلاش