كود سبور//

جمال السلامي، مدرب الرجاء البيضاوي عبر عن ارتياحه بالمهمة الجديدة واخا حجم المسؤولية الملقاة على عاتقه.

وأكد السلامي ف الندوة الصحافية اليوم الخميس، أنه غادي يدير كل ما ف جهدو مع مساعده يوسف السفري باش يحقق شي حاجة مزيانة للجمهور الرجاوي.

السلامي عارف ان هاد المهمة غادي تكون صعيبة، لأن جمهور الرجاء ذواق وغيور على فرقتو “نحن أمام مسؤولية كبيرة ومباريات قوية أهمها الوداد البيضاوي والترجي التونسي واللعابة مستعدون باش يحققوا نتائج ايحابية”.

وبخصوص تأثير التزام لاعبي الرجاء مع مباريات بالمنتخب المحلي أو الأول، أكد السلامي أن هاد الشي غادي يطرح مشكل للرجاء، لكن حنا غادي نتعاونو مع وحيد خاليلوزيتش، لي جالسناه البارح وتكلمنا معاه على إمكانيات اللاعب بدر بانون وحنا غادي نسقوا غدا كذلك مع اللعابة دياولنا، لي ف المنتخب الوطني على الاستعدادات الديربي والترجي التونسي.

جمال السلامي تكلم كذلك على الانضباط بالفرقة وگال “أنا ما غادي يكون عندي حتا مشكل ربما كان هادشي ف السابق قبل ما نجي. الجميع أبدى استعداده والتزامه باش نرجعو الرجا لسكة الانتصارات والالعاب”.

وكشف السلامي عن سعادته بتدريب الرجاء “من بين أهم الطموحات التي كانت لدي هي تدريب فريقي الأم، وتدريب هذا النادي فهو شرف كبير لي”.

من جهته أكد يوسف السفري أن هدفه هو إعادة الرجاء إلى وضعه الطبيعي وغادي نخدمو باش نكون في مستوى تطلعات الجمهور والإدارة لي دارت الثقة فينا”.