كود سبور//

نشر نجم البارصا الصاعد، عبد الصمد الزلزولي، تصويرة بان فيها لابس التوني ديال منتخب المغرب، ومن بعدها بداو التكهنات عاوتاني حول إمكانية تمثيلو المغرب بعدما رفض المشاركة مع أسود الأطلس فكأس إفريقيا.

وشارك الزلزولي مع المتابعين ديالو عبر خاصية “الستوري” على حسابو الرسمي بموقع التواصل “إنستگرام”، تصويرة بقميص منتخب المغرب، وهادشي بزاف اعتابروه إشارة على رغبة اللاعب فتمثيل بلادو واخا محاولات الاتحاد الإسباني لكرة القدم باش يختار منتخب “لاروخا”.

وكان الزلزولي، دار ضجة كبيرة فالفترة الأخيرة، بعد ما رفض المشاركة مع “أسود الأطلس” فنهائيات بطولة كأس أمم إفريقيا اللي غادي تبدا فالكاميرون الأحد الجاي، بهدف التركيز على مسيرتو مع برشلونة حاليا، قبل ما تؤكد وسائل إعلام إسبانية أن اللاعب غادي يمثل إسبانيا مستقبلا، وهادشي نفاه فوقت لاحق رئيس الاتحاد المغربي لكرة القدم، فوزي لقجع.