نجوى المالحي- كود//

اشنو الحق لي كيعطي الإنسان لراسو باش يهاجم شخص آخر، فقط لأنه مختلف عليه، ومابغاش يكون بحالو، هاد العقد ولات مؤخرا كتصرف بزاف في مواقع التواصل الاجتماعي، وبزاف ديال الجبناء لقاوها حيط طويل كيتخباو وراه باش يهاجمو الغير.

مناسبة هاد الكلام، الحدث لي وقع للمغنية الأمريكية جنيفر گراوت، لي كتعيش في المغرب مع راجلها، ولي تعرضت لهجوم عنيف من عند متخلفين، والسبب انها اختارت تحيد الحجاب وتحرر من قيود لبس كيحرمها من حريتها الكاملة.

جنيفر لي تخرجت من برنامج “عرب گوت تالنت” في لبنان، صدمت العالم العربي بصوتها لي بعيد على أصولها الأمريكية، وفي الآونة الأخيرة لي تزامنت مع شهر رمضان كانت جودات القرآن وحطات خرقة على راسها احتراما زعما للموقف، لكن الدواعش بغاوها ديرها ديما.

المغنية الأمريكية حطات تدوينة طويلة على حسابها في فيسبوك، شرحت فيها علاقتها بالله، وقالت انها كتخصها بوحدها، وبما أنها مسلمة واعتنقت الديانة قبل 7 سنوات فهي كتمشي بأخلاق الإسلام وما كتحكم على حتى شخص من خلال المظاهر ديالو.