جواد الانصاري كود ////

اليوم على خلاف باقي الايام ماغاديش نكونو تبخيسيين لمجهودات الاخرين لي كيسهرو على تنشيطنا ،ونبقاو غي كنتقدو فيهم ،وكندعيو بلعدم ،اليوم انا غادي نبوح ليكم گاع بواحد السر خطير جدا ، كنت مخبيه عليكم ،طيلة هاد لمدة ديال تغطية مهرجان موازين،
وبحكم انني انسان عندو مبادئ،

فمبادئي ماسمحتش ليا صراحة باش نوقف في صف لعدو في هاد الظرفية العصيبة التي تمر منها بلادنا الحبيبة ،ونبخس حدث موسيقي بمكانة موازين،لي عندو رمزية جد حساسة وذات بعد وطني،

وبناء عليه قررت انني نفركع اليوم الرمانة ،ونجيكم من لخر ،انا يا سادة يا كرام كنت مجرد انسان مندس ،حقير،مرتزق، صيفطاتني هاد الجريدة الموقرة، وبدعم من طرف شي اعداء ديال وحدة الترابية باش نحاول نختلق شي لعيبات ماكاينينش ونلفقهم ،من اجل الاساءة لسمعة مغربنا الحبيب ،ونسفه ما يمكن تسفيهه في هذا الحدث العظيم لي كيشهدو المغرب

ديك لهضرا كلها لي ديجا تقالت ديال كون ان الجماهير لي كانت تحضر غالبيتها من محدودي الثقافة الموسيقية ، ولموسيقى تا هيا كانت معظمها من نوعية شتيف هايتف،
داكشي كلو مامنو والو ،

نعامسيدي موازين ديال هاد العام في دورتو خمسطاش كان غاية في الروعة ،والتنظيم كان جد مبهر، نقدر نصنفو على انه اضخم وافضل واروع واحلى حدث موسيقي في تاريخ لبشرية،لقد فعفعنا به الاعداء،واصبناهم في مقتل ،وحققنا المبتغى ولله الحمد، وياريت گاع المهرجانات الكبار بحال تومورو لاند ودياول لماريكان وبريطانيا ولبرازيل وگاع لي على شاكلة موازين ومن يحدو حدوه يجيو يستفدو من تجربتنا لفريدة،ولخبرة ديالنا الضاربة في التاريخ ،

ودورة هذه السنة انا على يقين انها ستبقى راسخة في عقول وقلوب وجيوب المغاربة قاطبة،وإلى أبد الآبدين

فقط تجدر بنا الاشارة الى انه كاين واحد الاختلاف واضح جدا ،
موازين ديال داك العام فين كان في ذمة لماجيدي كان فيه غا صداع لكر ،ولمظاهرات،وخسران لفلوس،والناس للاسف الشديد مشات تنشط صدقت ماتت كاع في سهرة الاخ قائد الثورة الهمام عبد العزيز الستاتي نتيجة لسوء التدبير،

وهاد العام الامر نسبيا يختلف شوية على سابقه، بفضل السياسة الرشيدة لي انتهجها سي احيزون، داكشي داز عندو خفيف ضريف،تقدر تقول غا بحال عرس داروه فشي قاعة وسبونسوريزاوه مزيان وعرضو على الناس بزاف ،وجاو،وعزلو مالين لباش بوحدهم،والناس لمكلمنة بوحدها،ولقوادس بوحدهم،تفرجو، وشطحو، وردحو ، وسالاو ،وعطاو لغرامة ، ومشاو فحالهم،

سي احيزون هاد لمرة “طبعا بمعية المنظمين” استفد او بالاحرى استجاب لضغوطات الرجعيون ،الظلاميون،”للاسف” ،وكان داير داك لبلان ديال لباب لي يجيك منو الريح سدو واستريح،وكان حريص جدا على تفادي اي حاجة تقدر تدير شي ضجة اعلامية من قبيل ظهور شي مغنية عريانة،او شي انفلات امني لي يقدر “يبوز”لحفلة ،واي حاجة تقدر تسلط عليها الاضواء بمنحى سلبي، كان كيدير منها بناقص،

وماعرفتش علاش شي مرات كيجيب لي الله بحال ايلا كيكون واقف فلباب لدوك لفنانات لمشبوهات لي كيتعراو،وكيرمي عليهم لعار ووكيوصيهم يلبسو حوايجهم ،ويتسترو،حيث من الغريب جدا انه الدريات لي كيكونو مع بيتبول مثلا ولا كريستينا لي جابو لبارح يجيو لابسين ،لباس ” محتشم”

ديك لمرة ،جابو لينا مريام فارس فخنشة ،دوزناها بجغيمة لما،وقلنا شي باش ماكاين،ودابا عاود جايبين لينا كريستينا اغيليرا بسروال كحل، هادشي را ماشي معقول ،وخص يتعاد فيه النظر،
واش حنا يهووود

غي هو على ذكر كريستينا ،هادي شهادة لله ولتاريخ ولجغرافية ،السيدة مسيكينة والله تا حللت رزقها ، ودارت مجهود جبار، وصورت طريف ديال لخبز حلالا طيبا اودا سي احيزون. دارت خدمتها وداتها مجموعة ولي عطيتوها تستاهلو. واخا تحيدوه لينا وتعطيوه ليها ،الدنيا هانية. حيث حنا اصلا ولله الحمد، ما خص ديلمنا تا خير ……