محمد سقراط- كود

—
فالبداية ديال المواقع الإجتماعية دخلنا ليها وحنا عندنا توق باش نوصلوا صوتنا كأفراد ، هاد الصوت لي كان مخنوق بالعيب والحشومة والحرام وبالخوف من المخزن لي رباوه فينا الجيل لي سبقنا ، كنا جينا مع وقت الإنصاف والمصالحة وانتشار الكتابات فالجرائد والكتب المطبوعة حول سنوات الرصاص لي زادتن اكدات لينا علاش الجيل لي قبل منا كان كيخاف يصدح بالصوت ديالو ، ولكن بالنسبة لينا حنا تطرح الويب كبديل للشارع ، وبغينا نغوتوا حتى حنا بالجهد ونعبروا على إراهاصات الجيل ديالنا على أفكارنا نمط عيشنا كيفاش بغينا نشوفوا بلادنا الحاجات لي كتضرنا ، ويتسمع هاد الصوت ديالنا لأبعد مدى .
كانت باقا فينا الخلعة من المخزن لي تحيدات شوية بشوية بحكم أنه عمرو داها فينا أو تسوق لينا ولآشنو كنقولوا ، وفواحد الوقت عرف الويب المغربي أزهى مراحله كلها كيغني على ليلاه فقنت وتحيد الخوف لدرجة وليتي تشوف فيديوات وكتابات كانت في وقت مضى كتجر للحبس وشي كيتجدر على شي ، ولكن مؤخرا بانت ظاهرة ديال دوك الملتحقين الجدود لي ماقادرينش يكونوا عندهم شخصيات متفردة خاصة ، وعاجزين على أنهم يكون عندهم محتوى فردي خاص بيهم وأو كيعبر عليهم ، تكتلوا فمجموعات قطيعية كيعتابروا كينونتهم هي إنتمائهم لديك المجموعة وماشي كينونتهم كتحدد بشكونهوما كأفراد ، وبداو كيسينياليو أي حاجة مكتعجبهمش ، أو حسن منهم أو مختالفة عليهم ، والنتيجة كانت تضييق لمجال الحريات فالويب المغربي وهاد المرة للأسف ماشي من عند المخزن و إنما من عند أفراد الشعب لي بحالك بحالهم .
هاد اليوماين انتاشر فيديو لواحد الشاب سميتو سكوزا ولد القلعة ، الفيديو تقربيا كلو كيبكي فيه لأنه تعرض للحكرة فالويب، فقط حيث كيخصر الهدرة فالفيديوات ديالو ، ناضو سينيالاوه باش تسد ليه القناة ، الموشكيل فهادشي هو أن الدري مقودة عليه بزاف ، عايش فالفقر فظروف مقودة يالله عندو هاديك لاشين كيعيش بيها ، كيدير حاجات لي خاصين بيه وبواحد الفئة وهو التعليق على الألعاب الإفتراضية ، يعني راه الى مكنتيش مهتم ماغاديش تدخل تشوف المحتوى ديالو ، وكيهدر بالهدرة لي كيدويو بيها كاع المغاربة بيناتهم ، المشكل هو أن هاد السيد بدا كينجح نوعا ما فداكشي لي كيدير والقناة عندو بدات كتمشى وولا كيدخل منها مصيريف ، بلا مايسب حد بلا ميآذي حد بلا مينافس حد فطرف ديال الخبز ، مضارب مع الوقت من بيت فالسطح ديال دارهم ، ومع ذلك المخصيين عديمي الإبداع كيسيناليوه باش يحرموه من هاد مصدر الرزق البسيط ، بسبب أنه كيخسر الهدرة ولكن السبب الحقيقي أنه قدر يتحدى عرام ديال العوائق ودير قناة ويجمع مشاهدين ليها ، وهادي صعيبة على بزاف ، البكاء ديال هاد الشاب المغربي المكافح كان بسباب الحكرة والظلم لي تمارسات عليه من قفبل شباب مغاربة خوتو محسادة ، وماشي غي هو راه أنا نيت مشات ليا شين فيوتوب والفايس ديما مبلوكي وبزاف خريين بحال هاكة كيعانيو من نفس المشكل ، ألا وهو كره وحسد المغاربة لخريين ليهم وممارستهم الرقابة والقمع الجماعي الهستيري ، هنا غادي نعرفوا أنه حاليا موشكلتنا ماشي مع المخزن فمجال الحريات مشكلتنا مع بوزبال وهو لي خاص نحاربوه ونواجهوه نصدموه حتى يتقبل الأمر أو يتشافى .