سهام البارودي كود ////

قبايلة دخلت نقلب على deal ديال ماساج فواحد السيت ساعة لقيتو مدبوز بدوك العروض ديال العشاوات و الغداوات و لوطيلات ! Les dîners romantiques ! Les offres spéciales pour amoureux !داكشي بزاف ! و القلوبة حومر بارتو ! المارشي ديال “الحب” مزوهر هاد ليامات و tant mieux !نقدرو نقولو اليوم أنو المغاربة دخلاتهم العولمة واخا طبعا مازال دوك اعداء الفرح لي فينما كاين شي احتفال كاينقزو باش يحرموها على المغاربة “عيد الحب حرام” “حنا كانحتافلو بالحب كل نهار” هو كاتلقاه مشاقف مع مرتو كل نهار غواتو كايتسمع من لوطوروت ! و دوك لي كايبردو على راسهم بديك الهضرة من قبيل ” وا راه عيد تجاري هادشي ديال البيع و الشرا و خسران الفلوس” و علاش كاين شي عيد ماشي تجاري ؟ لوطيلات و الريسطورات مايتحركوش ؟ يسدو باش يبقا أبو لهب على خاطرو ؟ و لكن بالرغم من دوك القلاع الصامدة ضد التغيير نقدرو نقولو أنو المغاربة فحال الناس ديال العالم كامل دخلو فهاد الموضة ديال عيد الحب …

الحب ! هاد الكلمة لي قليل فينا لي غايكون سمعها فدارهم فاش كان صغير من غير فالتلفزة فاش كان الفريدو كايقول ” أحبك يا كوادالوبي”! علاقة المغاربة بالحب فشي شكل … معنكشة ! كانحشمو من الحب ! و بزاف ماكايعرفوش يعبرو عليه قلال المغاربة لي شافو واليديهم كايقولو لبعضياتهم كانبغيك آ فلان ! الحب حشومة! الحب حرام ! و مؤخرا مع جيل الفايسبوك ولا الحب “تعناب” !و لكن بالرغم من هادشي تاريخ”الحب” كايتطور و اليوم المغاربة ولاو كايحتافلو بالحب و تاهوما كايشريو الشكلاط و الورد و الكادويات كلا على حساب جيبو ! من التلاميذ لي كايشريو لبعضياتهم السناسل ديال النقرة فيهم Love منقوشة ! حتى للطلبة لي كايشريو نونوسات حتى لي لاباس عليهم و يقدرو يخرجو و يتعشاو برا … تعددت الطرق و السان فالونطان واحد و لا عزاء للحاقدين.

و لكن كايبقا السؤال لي كايطرح نفسو ، هو علاش كانحتافلو بعيد الحب ؟انا شخشيا كانشوف بلي الاحتفال بعيد الحب ولا مظهر من مظاهر التمدن ! فحال الكرافاطة ! فحال الكوستيم … باش بنادم كايثبت لراسو راه ولا انسان متمدن ! و بكثرة ماهاذ الرغبة ولات مسيطرة على بنادم ! بزاف ديال الناس اليوم كايحتافلو بيه ماشي كمناسبة باش يحتافلو بالحب و لكن باش يديرو داكشي لي دارو الخرين ! ولا عيد الحب ابتزاز ! فعوض مايكون مناسبة لل”حب” و لا شيء غير الحب! ولا كايشكل ضغط على لي محتافلين بيه ، و لا عندنا فالمغرب عيد الحب كايشبه لعراساتنا كايشبه لسبوعاتنا ! كانديروهم باش يشوفوهم الناس و نبانو بيهم على الناس و نعاودوهم للناس و حنا ؟ ماكانحسوش بيهم كيفاش دازو !عيد الحب اليوم بزاف ديال الناس كايحتافلو بيه حيت خاصهم يركبو الموجة و يحتافلو و يديرو دوك الطقوس(العشا، الورد، الشكلاط، الكادو) يتسماو تاهوما ناس موديرن !

وبين التطرف ديال هادوك لي كايشوفو فعيد الحب “حرااام و بدعة ” و التطرف ديال الخرين لي كايمارسوه بواحد النوع من الضغط و الابتزاز كايبقا العيد و كايضيع الحب …