كلنا كنا كانتسناو الماتش ديال المنتخب المغربي مع منتخب الكونغو واحنا كلنا حماس و أمل … حيت بغينا نفرحو من قلبنا محتاجين للفرحة بعد الماتش ديال بدر هاري ايووووااا ماكتابش لينا نفرحو بتاحاجة ..

لا بالسينما لا بالرسم لا بالنحت لا بباقي الفنون لابالرياضة لا بالحكومة لا بوالوووو …

وهاداك اللي تايقرا دابا وباغي يقوليا انتي اشنو درتي نقوليه كون غير بحالي وانتقدني مرحبا ، أنا في مجالي درت اوبزاااف وليت استاذة وعضوة في لجنة تحكيم المسابقة الدولية للرقص الشرقي في أكبر مهرجان رقص في العالم ووصلت الرقص المغربي لأهم مدارس في العالم ….وماااازال نزيد نكمل و اللي ماعجبتوش نفقصو ووليت كاتييييبة نعام اسي وعندي عمود اسبوعي وماااازااال …..

ماعليناش نرجعو لموضوعنا كلنا البارح شفنا الماتش كانو اللاعبين المغاربة يتحركون بشكل جيد في صدر الملعب ووصلو شحال من مرة للمنطقة الحساسة ولكن للاسف القذف كان في العارضة يعني ماجابوهش في الشبكة ….

اما المنتخب الكونغولي فكان اذكى بكثير ودار مجهود كبير واستماتة في الدفاع على منطقتهم الحساسة في الملعب حتى جابو الهدف في الشبكة وخا اللاعب الكونغولي تعطل جابو في الدقيقة ستين …

كنت كانتمنى لو اللاعب الكونغولي مايدخلوش و يقذف يد الحارس ولكن للأسف اخترق المنطقة الحساسة بكل ذكاء واحنا هزينا واحد في هاد البطولة
نتمنى اسود الأطلس ياخدو الدرس ومايعاودوش يهزو واحد اخر في هاد البطولة

حظ سعيد لأسود الاطلس

رسائلي للكبار فهما لا الكبار سنا

الله يجيب اللي يفهمنا ولا يعطيناش