حكيمة لعروسي كود ////

من استاذة رقص الى كاتبة رأي ماتفهمونيش غلط راه باقا استاذة رقص ومتشبتة بمقولتي الخالدة《 تلويزتي قراري.. و حريتي اختياري ..》

اليوم بغيت نهضر في الموضوع اللي كتناقلو الصحف و المواقع و هو حسب ما سمعت واللي ما كذبو حتى واحد لحد الان و التقليد على اللي كتب ولد فاطمة النجار جا من فرنسا ومكشكش وطالع ليه الدم وكيهدد مو اللي مسكينة كتمر بحالة صعبة .. وبنتها الطبيبة اللي في المستشفى في حالة حرجة

انا غادي نقول رايي في الموضوع وكنتمنى الشفاء لبنت فاطمة بقات فيا لانها ضحية مجتمع و الترابي اللي رباوها عليها

في عيد الام السابق وجهت رسالة لوم وعتاب لكاع الامهات في الدول العربية في بلاصة مانقوليهم عيد سعيد بالحلوى والفانيد قلت ليهم الرجال اللي كنتقاتلو معاهم احنا ليوم باش نعيشو بحرية نتوما اللي ربيتيوهم على عدم احترام المرأة

ايييييه الالة فاطمة انت كنتي كتقولي لولدك و لوليدات الناس اترضاه لامك ؟؟؟ اترضاه لاختك ؟؟ اذا كنت ترضى ذلك فانت ديوث وهااااااااا السحر انقلب على الساحر كون ربيتي ولدك على انه يحتارمك و يحترم حريتك الشخصية كون كعما وصلتي لهاد المواصل وكون ربيتي بنتك وجهزتيها بشخصية قوية كون قدرات تواجه المجتمع و تواجه الناس و الذكور راه ما قلتش الرجال قلت الذكور وطبعا كاين فرق دابا نهضر عليه في مقال آخر المهم دابا خليونا في موضوعنا

ولدك يالحاجة انتي علمتيه يكون رقيب على مو وعلى ختو وعلمتيه ان شرفه بين فخدي امرأة كون ربيتيه على معنى الشرف الحقيقي و على الانسانية كون كعما تصرف ضدك بهاد العنف بدل ما يواسيك و يساندك في محنتك

خليتيه يضرب ختو في الصغر ويتبعها و يتحكم فيها ويقوليها انا راجل ندير اللي بغيت و انتي مرا ماعندك حق في والو هاهو اليوم غادي يضربك و يضرب اختو ومرتو وبنتو …. علمتيه يغوت عليكم و يعتبر نفسو ولي امرك هاهو كيدير داكشي اللي علمتيه ودويو يالموجتاهدين صحاب ولي امري ادرى بأمري
انتي بغيتي مجتمع كيحاسب المرأة على لباسها وعلى نظرة عينيها اللي اعتبرتيها زنا اذن ماتقلقيش ملي نحاسبوك على 3 اشهر ديال المعاشرة الجنسية كيفما تكتب في محاضر الشرطة راه ماشي مرة وكنتو سكرانين و سخنتو على بعضياتكم ندوزوها بشريبة الما لاااااا راه 3 اشهر و انتوما تاتباونتيو في الخفاء و تجي من وراها في العلن ديري الدعوة و تسممي افكار الشباب بالتطرف

انا ماشي تانشمت فيك و كان ممكن نتضامن معاك مليون في المية لان كل واحد حر في الجسد ديالو ولكن مانقدرش لان بحالك خرجو على بزاف الشباب اللي مساكن تيقو انكم مثال للشرف و العفة كنقصد الشرف بمفهومك انتي الالة ماشي بمفهومو الحقيقي واليوم ماغاديش نشمت فيك لان هادي ماشي اخلاقي ولكن غادي نقوليك اللي دار الذنب يستاهل العقوبة دوقي السم اللي بختيه في وجوه الناس اللي كانو كيتيقوك وفكري كون قدرتي تسيطري بافكارك الهدامة المتطرفة على المجتمع كلو كون راكي اليوم انتي في ميدان عام واحنا كنرجمو فيك الى حد الموت واول وحدين يبداو الرجم هوما ولادك اللي توجعتي بيهم و تعدبتي عليهم وماغاديش يكون عندك حق حتى تشرحي لينا اشنو احساسك ملي ولدك يرجمك بدون رحمة لان انتي غيييير مرااااا ولا ولدك غادي يقدر يشرح احساسو وهو كيرجم مو اللي كان تيشوفها اطهر الناس وطبعا الطهارة والعفة عندو ماشي بمفهومي لااااا بمفهومك انتي اللي ربيتيه عليه لانه غادي يتمنى غير تموتي دغيا و الناس تنسى و هو يقدر يرفع راسو وسط منهم لانه غسل عارو بيديه هادشي غير الظاهر ولكن الباطن وحالتو النفسية ماعالم بيها حد يقدر يمرض نفسيا و بناتو ومراتو يدفعو الثمن طول العمر و يدفعو الثمن لبناتهم و بنات بناتهم

لالة فاطمة واللي بحالها راجعو نفوسكم راه اللي زرعتوه غادي تحصدوه و المرأة هي اللي كتاكل العصا في اللخر

رسائلي دائما للكبار فهما لا الكبار سنا الله يجيب غير اللي يفهمنا و لايعطيناش