الصبليون مازال طروماتيزي باختيار دياز المغرب. “الباييس” قدمات ابراهيم كصبليوني=الصورة
سامي العلوي -گود //
ضربات غرفة الجنيات ديال محكمة الاستئناف فسطات اليوم الاربعاء، الموظف من ذوي الاحتياجات الخاصة (م.ل) بالسجن النافذ 4 سنين ومعه الوسيط ديالو (ه.ب) حتى هو ب4 سنين ديال الحبس في الجلسة لي كانت هاد العشية.
وعطات المحكمة للطلبة لي ظهرو سمياتهم في التحقيق 4 اشهر ديال الحبس النافذ، وجاء قرار المحكمة بعدما حجزت ملف القضية الى اخر جلسة .
الموظف بمصلحة النقط بكلية العلوم القانونية والسياسية بسطات والطالب السابق الوسيط دازو فابريل قدام قاضي التحقيق بمحكمة الاستئناف بسطات باش يحقق معهم تفصيليا في ملف “المال مقابل النقط” ولي طيحاتو الفرقة الوطنية للشرطة القضائية بالدار البيضاء اثناء التحقيق.
ووفق مصادر مطلعة ، تدارت تحريات ميدانية امنية كانت الخلاصات ديالها أن طالب سابق كان كيجيب الفلوس للموظف ولي هو من ذوي الإحتياجات الخاصة، من عند الطلبة سواء “في كاش بليس” ولا في الحساب ديالو في البنك السياحي والعقاري.
واستدعات الفرقة الوطنية في مقرها بشارع ابراهيم الروداني ثلاثة ديال الطلبة لي عطاو الفلوس مقابل يتزورو ليهم النقط، وبالفعل اعتارفو انهم تعطاوهم نقط اخرى باش نجحو.
وحجزات عناصر الفرقة الوطنية للشرطة القضائية بالدار البيضاء بيانات نقط طلبة واوراق طلبة ومحاضر النقط بحيث تبين ليها التزوير بالملموس.
وفي تصريحات الطالب السابق قال على ان التحويلات المالية للموظف كانت غير سلف، وبلي هو جا كسطاجير، ولكن التحويلات وصلات في بعض الاحيان ل 182 تحويل ديال بيع البحوث المحددة في 1500 درهم باستخدام تقنية “كوپي كولي”.
واما الموظف نكر انه هو لي مزور النقط وقال ان شي حد شفر ليه المو دو باس ديالو وعلى التحويلات قال على انها غير ديون ديال ناس مسلفهم.