الوالي الزاز -كود- العيون////

[email protected]

يعقد مجلس الأمن الدولي، اليوم الثلاثاء 16 أبريل 2024، جلسته المغلقة حول الصحرا، واللي غاد يقدم فيها كل من المبعوث الشخصي للأمين العام للأمم المتحدة لنزاع الصحراء، ستافان دي ميستورا ورئيس “مينورسو” جوج إحاطات للأعضاء.

ويضم مجلس الأمن 15 دولة عضو يحضرون الجلسة تحت الرئاسة الشهرية ديال دولة مالطة، ويتعلق الأمر بالأعضاء الخمسة الدائمين وهم الولايات المتحدة الأمريكية وروسيا وفرنسا والصين وبريطانيا، بالإضافة لعشر دول غير دائمة العضوية وهي الجزائر وإكوادور وگيانا، علاوة على اليابان ومالطا وموزمبيق وكوريا الجنوبية وسييراليون وسلوفينيا وسويسرا.

ومن بين هاد الدول اللي مع المغرب واللي ضدو واللي عاطي التيساع للنزاع ومكتافي بالجملة الشهيرة ديال دعم جهود الأمم المتحدة لتحقيق حل عادل ودائم ومقبول للنزاع.

بالنسبة للدول اللي تقف فصف المغرب هناك الولايات المتحدة الأمريكية وسييراليون وگيانا اللي معتارفين بمغربية الصحرا، وكذلك فرنسا اللي عبرات على هادشي من خلال دعم مبادرة الحكم الذاتي فزيارة وزير خارجيتها ستيفان سيجورني للمغرب مؤخرا.

وبالنسبة للدول اللي ضد الوحدة الترابية للمملكة المغربية نجد نظام العسكر الجزائري فالصف الأول متبوعا بموزمبيق والإكوادور وهوما دول كتعتارف بالبوليساريو وعندها علاقات مباشرة معاها، فضلا عن روسيا اللي صراعها مع الولايات المتحدة الأمريكية كيخليها دائما شادة العكس مع واشنطن.

وعلى خط الحياد كاينين دول خارجة النزاع وكتحاول ما أمكن توقف على مسافة واحدة من الأطراف من خلال اعتماد مظلة دعم الجهود الأممية لحل النزاع وتشجيع عمل المبعوث الشخصي ودور “مينورسو” فالصحرا، وهاد الدول هي بريطانيا والصين واليابان، ثم مالطا وسويسرا وكوريا الجنوبية وسلوفينيا.