كود سبور//

أكد يحيى جبران الكابيتان ديال الوداد الرياضي أن الفريق جاهز للفينال ديال عصبة أبطال إفريقيا ضد الأهلي المصري، وأن الهدف ديال الواك هو يربح اللقب الرابع ويولي أول فريق مغربي كيربح العصبة 2 ديال المرات متابعين.

وقال يحيى جبران فالندوة الصحافية قبل الفينال بين الوداد والأهلي: “كنشكر جمهورنا، الماتش غيكون صعيب وحنا نسينا المباراة ديال الذهاب، وعندما شوط ثاني دابا فالمغرب ونتمناو نكونوا استفدنا من الشوط الأول فالقاهرة، وهدفنا نديو عصبة أبطال إفريقيا باش نكونو أول فريق مغربي كيربحها عامين متابعة”.

وكمل جبران: “خدمنا مزيان هذه السيمانة باش نربحو الماتش نديو لقب عصبة أبطال إفريقيا، والمباراة غتلعب على مجموعة من العوامل ومن بينها تعليمات المدرب اللي خاصنا نترجموها فالتيران وحنا اللاعبين خاص تكون عندنا لاكرينتا والروح”.