كود سبور//

قرر فريق اتحاد جدة السعودية يسلك المساطر القانونية فالقضية ديال توقيف اللاعب ديالو الدولي المغربي عبد الرزاق حمد الله ولي تم توقيفو من طرف الاتحاد السعودي لكرة القدم لمدة ديال 4 أشهر تم أيضا توقيف جوج ديال المسؤولين من اتحاد جدة بسبب شكوى تقدم بها النصر السعودي الفريق السابق ديال اللاعب المغرب.

وكيف ما كشف “كود” فوقت سابق، فاتحاد جدة متمسك باللاعب ديالو عبد الرزاق حمد الله، والإدارة ديال النادي غتقدم بالاستئناف فالقضية لي صدر فيها قرار بتوقيف المهاجم المغربي لمدة ديال 4 أشهر، وهاذشي لي أكدو إتحاد جدة بشكل رسمي فبلاغ نشرو أعلن فيه أن المجلس ديال إدارتو بداو فعليا فالخطوات القانونية الكفيلة بالمحافظة على الحقوق ديالو وديال المنسوبين له في مقاضاة جميع من تسبب في الإضرار به الاتحاد من أشخاص داخل وخارج المنظومة الرياضية.

وعبر إتحاد جدة على التفاؤل ديالو بخصوص القضية لي توقف فيها عبد الرزاق حمد الله، وعلى الثقة ديالو في أن العدالة ستقول كلمتها في آخر المطاف في هذه القضية، مشيرا أن الحكـم مـا زال حكماً ابتدائيا، وأكد على أنه غيواصل تحركاتو القانوني حتى آخر درجات التقاضي المتاحة أمام الجهات الرياضية وغير الرياضية بشقيها الجنائي والمدني.

وكان الإتحاد السعودي لكرة القدم صدر عقوبة  قاسية فحق الدولي المغربي عبد الرزاق حمد الله والفريق ديالو إتحاد جدة، بحيث وقف عبد الرزاق حمد الله لمدة ديال 4 أشهر وتغريمو 300 ألف ريال سعودية، ووقف معاه حامد البلوي وهو المدير التنفيذي ديال الكرة فالفريق لمدة 6 ديال الأشهر، وعطاوه يخلص 300 ألف ريال سعودية، وكذلك وقف مشعل السعيد مدير الفريق الأول فاتحاد جدة لمدة 3 أشهر.

وبالمقابل ففريق النصر السعودي وحسب المتتبعين ديال كرة القدم السعودية، ما تهضمش ليه التألق ديال عبد الرزاق حمد الله مع فريق اتحاد جدة السعودي، وبالتالي فالمسؤولين ديالو كيحاولو يبحثو على أي سببب باش يعرقلو المسيرة ديال النجم المغربي مع الفريق الديالو الجديد من بعدما تفارقو معاه، مع العلم أن الفراق جا من عندهم وهما لينفاصلو عليه فالوقت لي كان هو ملتزم بالدفاع على القميص ديال فريق النصر وكان كيطالب فقط بمستحقاتو المالية.