أحمد الطيب ـ كود الرباط//

رجل فالاغلبية ورجل فالمعارضة، هادي مناورات البام، حزب فالحكومة كيقول دبا كيحارب الفساد، قليل لي يثيقو. حيث هادشي باين غير من الملفات ديال الفساد فالمحاكم، رؤساء جماعات ومنتخبين ملفاتهم فجرائم الأموال. ورغم ذلك هاد الحزب متبراش منهم، فالمقابل الاحرار غير فاش تم احالة برلماني منهم وقيادي بجهة فاس، جمدو ليه العضوية.

دبا ناض البام لبرنامج فرصة وشكك فيه وكيقول كاين فيه فساد، ناض حيث مزال متسرطاش ليه قرار رئيس الحكومة يحيد للوزير المقاولات الصغرى والشغل والكفاءات، هادشي باين من خرجات هشام المهاجري، عضو المكتب السياسي.

فبلاغات المكتب السياسي لهاد الحزب، كيهاجم فقط وزراء الاحرار، ومرة مرة كيجبذ المحروقات، واخا وزيرتهم ديال الانتقال الطاقي مسؤولة على الملف، وفهاد الظروف ساكتة وضاربة الطم، وحتى اول خرجة لي دارت كانت ضعيفة ودارت اخطاء فادحة فاش قالت بلي هادشي لي واقع فالعالم مغاديش يأثر على الاسعار. دبا هادي كفاءة فالاقتصاد ولا فالطاقة؟.

المهاجري لي ولا متخصص في اطفاء الحرائق الداخلية ديال البام فالجهات، اخرها جهة كلميم ولي فشل فيها حيث انصار بلفقيه رفعو شعار :”ارحل يا الغذار” فوجه الحزب وامينه العام لي محضرش.

المهاجري ميمكنش يدير هاد الخرجات بدون ضوء اخضر من قيادة البام، وهادشي باين، بحيث ان البام ولا متخصص فالهجوم على وزراء الاحرار لي كيقود الحكومة.

القيادية فاطمة الزهراء المنصوري سبق ليها قالت فحوار سابق بلي كاين تجانس مع الاحرار، وبان رئيس الحكومة عندو الحق يعطي الملف ديال برنامج فرصة لوزيرة اخرى، هذا حق قانوني.

وباش يصححو اخطاء وزيرتهم، جابو خبير من حزب الاستقلال، ادريس بنهمية للمكتب السياسي، لتداول في مختلف جوانب الأزمة الطاقية التي يعيشها العالم وانعكاساتها على الوضع الاقتصادي والاجتماعي الوطني، في أفق تعزيز التقارير التي تشتغل عليها لجنة اليقظة الاقتصادية التي أحدثها المكتب السياسي والتي تتابع عن كثب تطورات ومستجدات هذا الموضوع باستقراء التجارب الدولية كذلك والاستفادة منها في بلورة إجابات وحلول وطنية توضع رهن إشارة الحزب للتخفيف من حدة هذه الأزمة.
نرجعو لبرنامج فرصة، دبا هاد البرنامج فيه الفساد وفيه صفقات مشبوهة، حسب تدوينات المهاجري.

المهاجري فاحدى الخرجات ديال قبل ايام بجهة درعة تافيلالت قال :”حذاري لمن ينوي ان يستأتر بالمال العام من أجل مصالح سياسيوية وانتخابوية واخا يكون مع معانا فالتحالف مغانستكوش، القطاعات الحكومية لي معانا كيشتغلو بما يرضي الله، الوزيرة المنصوري ولا الوزيرتين وسي بنسعيد ونساو الانتخابات وكيشتغلو بالالويات ..”.

دبا حسب المهاجرين غير وزراء البام لي خدامين بما يرضي الله، والوزراء الاخرين لا.

من غير هادشي هو ان المهاجري نسا بلي كان باغي يمشي للاحرار، غير يجاوبنا علاش مقدرش يمشي للاحرار وشكون منعو، اضافة الى هادشي راه يلا كان البام فعلا ضد الفساد خصو ياخد قرار فالمهاجري لي تابعاه فضيحة لافوار فطنجة. لكن بلاصت ما يحاسبوه تنظيميا جابوه باش يديرو بيه السياسة ويكون بوق اعلامي للحزب، مع العلم ان المهاجري قاطع المجلس الوطني للحزب لي انتخب وهبي يعني ماطلعش بالقواعد التنظيمية.