كود- عن Le Matin//

يقدر يمشي المغرب فخطة تلقيح القاصرين اللي قل من 17 لعام، هذشي اللي صرح بيه مولاي سعيد عفيف، عضو اللجنة التقنية والعلمية للتطعيم ضد كوفيد 19، لصحيفة Le Matin.

وقريب غيكون اجتماع للجنة باش تناقش إمكانية تلقيح اللي بين 12 و17 لعام، قبل ما تبدا السنة الدراسية، باش يدوز الموسم الدراسي فأحسن الظروف، وماتنتقلش العدوى فصفوف التلاميذ، مع ظهور المتحور الهندي فالمغرب.

وزاد الطبيب، اللي كيشتغل كذلك ك”بيدياتر”، أن كَاع الدراري الصغار كيمكن يتقاسو بكورونا، او يتصابو بالمرض بشكل حاد، خاصة فهذ الفترة الحرجة اللي كتعرف انتشار سريع لمتغير دلتا، اللي كيحتوي على حمولة فيروسية عالية وكينتقل بسرعة.

وهذ القرار اللي غتتم دراستو حديث، فرضاتو الوضعية الوبائية الجديدة، بحيث فالأصل، كتستهدف حملة التلقيح ضد كورونا فالمغرب المواطنين اللي فايتين 18 لعام، وكتقدر نسبة الساكنة المستهدفة ب25 مليون نسمة، حسب ما كاشفة عليه وزارة الصحة، فالموقع الرسمي للتلقيح.