هناء ابو علي كود كازا//

ايلى كنتي فالمغرب مت تستغرب ما تعجب. فعلا مع هاد نوع من السياسيين للي معندهمش علاش يحشمو وعجبهم البوز الاعلامي بمواقف “انتهازية”، هادشي شافوه المغاربة ليلة الجمعة 5 مارس 2021، فاش تم التصويت على القاسم على المسجلين، وناض هشام المهاجري البرلماني فالبام المدان في قضية اختلاس اموال عمومية سنة 2017، كيدافع على القاسم الانتخابي ويشير على حزب البي جي دي اللي جاب 120 برلماني للتصويت ضد القانون.

هاد المهاجري اللي كان كيعارض امينو العام وهبي ومحضرش للمؤتمر، اليوم تحول الى صديق وهبي بعدما دار معه صفقة وطواو الصفحة، وهادشي. ليل على أن وهبي براسو معندوش الكلمة حيث فاش جا طلع بدا يفرق فالتصريحات وكيقول مغاديش نرشح اللي عندهم سوابق فالانتخابات، وراه ماشي غاذي ترشحهم راك تعطيهم يهضرو كاع فالبرلمان باسم حزبكم، شوهة ما بعدها شوهة، تعطي لمدان بالسجن فقضية جرائم اموال يعطي الدروس فالديمقراطية.

سنة 2013، قضت غرفة جرائم الأموال لدى محكمة الاستئناف بالدار البيضاء، بالسجن النافذ في حق هشام المهاجري، كاتب مجلس جهة مراكش آسفي، والنائب البرلماني عن شيشاوة، وأدانته بسنتين سجنا نافدا، في ما بات يعرف بقضية عبد اللطيف التومي الرئيس الاسبق لبلدية الجديدة، حيث كان المهاجري، وهو أحد أكبر منظمي المعارض التجارية بالمغرب، يستغل فضاء ملعب أحمد الأشهب لإقامة معرض الجديدة التجاري دون مقابل، وهي القضية التي كشف عنها تقرير للمجلس الجهوي للحسابات سنة 2011.

ماشي غير هادشي المهاجري ناض جبد صفقات وزارة الصحة وموراها ضربها بسكتة، واش حيث خو وهبي اللي معروف انه من اللوبيات ديال الادوية فالمغرب، واش دار صفقة مع وهبي.

المهاجري اللي كان كيغوت ويحيح ويعطي دروس فالديموقراطية التمثيلية والعددية، راه مكانش كيقدر يخسر الخاطر لوزير الداخلية عبد الوافي لفتيت فلجنة الداخلية، فحال الى كيقدسو وفق مصادر فاللجنة، مكيخليش نواب اخرين ينتقدوه بزاف وكيتدخل باش يوقفهم. هاد الشي حضرنا ليه ف”كود” وشفناه. هذا تعول عليه يدافع على الديمقراطية ولا صورة المغرب.

ونهار التصويت على “القاسم الانتخابي” بغى يبين لينا باللي هاجم وزير الداخلية فمسرحية بايخة باخراج بئيس.

بلا ما نهضرو على الفضائح اللي دار فداكشي ديال السيرك اللي عندو فيه مشاريع، بحيث كاين حديث على شبهات تورطه في فضيحة سقوط جرحى فواحد السيرك ديال الالعاب ك خلل طارئ طال أرجوحة دائرية (manège)، وكذا حالة التدافع والارتباك التي سجلت جراء ذلك، بفضاء للألعاب المتواجد بدائرة مغوغة قرب محطة القطار بطنجة سنة 2019. هاديك الشركة ديال السيرك راه شريك فيها. خاصو يقول لينا بمن اتصل قبل ما يحط فطنجة وشكون عاونو وعلاش حط واخا السلطات المحلية كانت متحفظة.

البي جي دي حزب بين باللي ما يقدرش يسير بلاد. حزب ما عندوش الاطر وعلاقتو بالديموقراطية خاصها توضاح اكثر وتوظيف الدين فالسياسة مازال مستمر فيه. مع الولايتين الحكومتين باراكا علينا منو. ولكن جيبو ناس عندهم المصداقية وساهل يغلبوه. بحال هاد المهاجري راهم كيقويوه ماشي كيضعفوه. جيبو اللي ما عندهمش لوسخ. دابا بالمهاجري اللي كان فالاستقلال ويمشى فحضن الياس العماري يقبل على الحماية٬ ما يمكنش يتحارب “الحزب الاغلبي”.