عفراء علوي محمدي- كود//

هذي فضيحة جديدة من فضائح مجلس مدينة كازا، لبارح الكازاويين كيتفاجؤو بإزالة رسمة للفنان الإيطالي، فرانسيسكو كاميلو جيورجينو، المعروف باسم “ميلو”، واللي دارت هذي ماكاملاش عام، فعمارة كبيرة فساحة النصر، فدرب عمر.

غالبا مول العمارة غتكون رشقات ليه يحيد الرسمة ويصبغها بالبيض باش يثير المستشهرين يديرو إشهارهم فيها ويشد عليها الفلوس ويقسم حتى مع الجماعة اللي سمحاتليه بتدمير هذ الفن، حيت هو فالأصل ماعندو ما يربح من رسمة بحال هذي، فالوقت اللي أزمة كورونا ضاربة كلشي حتى للعظم.

نشطاء كزاويين على مواقع التواصل الاجتماعي عبرو على الغضب ديالهم من إزالة هذ الرسمة العملاقة ديال فنان عالمي معروف، واعتبرو أن هذي جريمة ضد الفن والفنانين، وأن الجماعة هي المسؤولة عليها، بحكم أنها مكتحميش بحال هذ اللوحات الفنية ومكتهتمش بيها.

والفنان “ميلو” وصلاتو التبركَيكَة بأن الرسمة ديالو تحيدات، وبقى مصدوم ومالقاش الكلمات باش يعبر، واكتفى فقط بنشر صورة ليها وتأسف وقال أنها التقطت من طرف صديق ليه كازاوي، بينما الناس فالتعليقات قالو بللي بهذ التصرف اللي تدار غاتولي فضيحتنا عالمية وكلشي غيقول أن المغاربة مكيحترموش الفن وماكيقدروهش.

وحاولات “كود” تتصل بكل من عمدة كازا، عبد العزيز العماري، النائب ديالو، عبد الصمد حيكر، لكن حتى واحد فيهم ما جاوب.