كود طنجة ///

واش الصبليون قررات فعلا فتح حدودها مع المغرب؟ اللا كذوب. ابدا واش اسبانيا دارت هاد الشي. اللي قرراتو حكومة بيدرو شانشيز وهاد الشي هادي مدة ماشي هاد السيمانا٬ هو فتح حدودها. غير كاين تفاصيل كثيرة. اولا راه مدريد دابا فاتحة حدودها٬ غير هي كاين شرط. اللي دخل لبلادها خاصو يدوز 14 يوم حجر. هاد الشي اللي خلى فرانسا طبق مبدأ فسياستها الخارجية وهو “المعاملة بالمثل” وفرضات على اي اسباني يدخل بلادها يدوز حتى هو 14 يوم.

هاد الشي كان هادي اسبوع. البارح تبدل التاريخ وعلن رئيس الحكومة الاسبانية انه تقرر تفتح حدودها مع دول الاتحاد الاوربي اولا والدول اللي عندها حالة وبائية متحكم بها ثانيا٬ من 22 يونيو اي الاثنين الجاي. يوم واحد بعد انتهاء حالة الطوارئ اللي بدات فهاد البلد من 14 مارس وتمددات 6 مرات.

دابا واش هاد الشي كيهم الرباط؟ وعلاش خاصو يكون كيهمو. هادي راها بلاد قررات تغلق حدودها البرية والبحرية بكل استقلالية. غادية تفتحو الوقت اللي هي تشوفو مناسب.

اسبانيا حتى هي باش فتحات حدودها مع اوربا ماشي حقاش الاتحاد الاوربي فرضها. ابدا. هادا حتى هو قرار سيادي واخا هادي دولة عضو فهاد الاتحاد. ايطاليا كانت فتحات حدودها قبل باش دور السياحة ديالها.

اذن المغرب يفتح حدودو الوقت اللي بغى هو واسبانيا ما فتحاتش حدودها معانا بل فتحات حدودها لراسها.