كود كازا ///
قصص غريبة كتوقع فزمن هاد الجايحة اللي هي اصلا كلشي فيها غريب. من هاد القصص اللي وقعات بجوج حباسة.
كلشي جمعهم. من الحبس اللي دخلوه وهما دايرين علاش الى حبس فصبيطار اللي دخلوه بعد ما ضرباتهم “كورونا فيروس”.
هاد الشي وقع فتطوان. جوج حالات تسجلات فيها. كان هاد الحباسة بجوج ف”سات فيلاج” بطنجة. الاول باش كان فالحبس وبطريقة عشوائية اختاروه ودارو ليه التيست. تطلق سراحو الاثنين اللي فات بلا ما يعرف النتيجة. حتى صاحبو تطلق سراحو. قصد البليدة اللي هي قرية جبل الحبيب اللي فاقليم تطوان.
خرجات التحاليل وبان باللي فيه “كورونا فيروس”. السلطة تحركات كتقلب عليه. لقاوه مقصر مع صحابو منهم اللي كان معاه فالبنيقة.
طبعا السلطة قررات دير ليهم كلهم تيست. طلع صاحبو اللي كان معاه فالحبس حتى هو فيه الفيروس.
دابا بجوج فصبيطار سانية الرمل بتطوان. محبوسين حبس اخر. حبس يقدر يكون اقود من الحبس العادي. حقاش ممكن يهدد الحياة. معزولين على العالم بصاح.
فيلم وصافي. سيناريو زوين بزاف حسن من هاداك الشي اللي كيقدموه فهاد رمضان.
