عفراء علوي محمدي- كود//

مئات المغاربة بقاو حاصلين فالحدود ديال سبتة مع المغرب، وماخلاوهومش يدخلو للبلاد، بعدما تسدات الحدود بين المغرب وسبتة نهار الخميس اللي فات بسباب انتشار فيروس “كورونا” المستجد فصبانيا، وهذشي خلا مجموعة منهم يتشردو ويباتو فالزناقي والباركينكَات.

“كود” تواصلات هاتفيا مع واحد من المتضررين اللي قال بللي “بزاف من المغاربة اللي هنا تسالات ليهم الفيزا، شي وحدين خرين ماعندهومش الفلوس باش يشدو الوطيلات ويكَلسو هنا، وهذشي خلاهم يباتو فالزنقة والباركينكَات ويتشردو”، على حساب هضرتو.

المتحدث نفسو كيقول بللي ثلث أيام والمغاربة فهذ الحالة، وزاد “حنا مكرفصين بزاف، الشتا والبرد علينا ومكاينش اللي تسوق لينا، والسيفارة قالت لينا باللي ماعندها ماتدير لينا، مايمكنش نبقاو هكذا بغينا الحكومة تشوف لينا شي حل”.

وصبانيا، ابتداء من غدا، غاتسد كَاع لوطيلات والقهاوي وكَاع البلايص اللي كيتجمعو فيهم الناس وغاتدير حضر التجوال، “وهذا كيعني أن حتى الناس اللي عندهم الفلوس فينا مغايلقاو حتى شي وطيل محلول يباتو فيه، وغايكون المآل ديالنا كاملين هو الزنقة”، على حد قول المغربي اللي حصل فصبانيا.

وطلب من حكومة سعد الدين العثماني تتدخل باش تدير لهذ المغاربة شي حل وتدخلهم للبلاد، وماتخليهمش مكرفصين بحال هكذا.

وللإشارة فرئيس الحكومة كاع ما على بالو هذشي اللي واقع فسبتة، والتكرفيص اللي كيعيشوه المغاربة، حيت قال لبارح، فلقاء ليه مع القنوات التلفزية الرسمية، بللي المغاربة فسبتة وصبانيا خاصهم يتسناو 14 ليوم قبل ما يدخلو للمغرب، باش يعرفو واش فيهم فيروس “كورونا” المستجد ولا لا.