محمد سقراط-كود///

السعودية غادي تحتاضن سهرة ديال إم تي في لي غادي تحضر ليها نيكي ميناج وبزاف ديال الفنانة خريين، وقبل من هادشي السعودية جمعات كاع الفقها ديال حرام وحلال ولي فيهم فريع الراس وكيديرو السياسة ودخلاتهم للحبس، وغادا بواحد السرعة فالإنفتاح إلى بقات هاكة راه السنوانت الجايا غادي نشوفو شي لاس فيكاس حلال فشي صحرا فديك الجيهة، ولكن قبل من هادشي فالمغرب كانون ناضو واحد الرباعة وذبحو جوج سائحات إسكندنافيات سالمات آمنات فشمهروش تأثرا بالإسلام السعودي لي باغا تخلص منو دابا، وقبل من هادشي عرف المغرب سنوات ديال محاربة الإرهاب ولحد الآن باقي كيفكك فالخلايا النائمة والفايقة ولي  مغمضة عين وحالة عين.

قبل ماتبدى السعودية هاد سياسية الإنفتاح راه دوزات عشرات السنين كتمول وتشجع على سياسة إغلاق العقول بعقيدة بول البعير والتشدد والسلفية والإرهاب، عشرات السنين وعرام ديال الحروب ومئات الألاف ديال القتلى بداهم من أفغانستان فحربها ضد السوفييت ونتا غادي وصولا للحرب فاليمن وسوريا وليبيا حاليا، هادشي كلو لعبات فيه السعودية دور كبير وأي واحد تفركع فشي قنت بإسم الإسلام فراه تفركع بإسم إسلام السعودية، حتى ولا اللباس الجهادي الأفغاني والنقاب هو الإسلام الحق، هادشي لي دخيل على ثقافتنا وإسلامنا لي عرفناه قرون كمغاربة ولي عمرو كان ملوث بهاد قوة الحلال والحرام، السعودية لي قراو فيها أغلب شيوخ السلفية ولي بسبابهم عرف المغرب أحداث دموية فالعديد من المرات، قررات أنها تنفاتح على العالم هادشي زوين أن أحد قلاع التشدد الديني والتطرف تمشي فمسار الإنفتاح .

قبل ماتبدى السعودية هاد عهد الإنفتاح وتبدى تستقبل بحال نيكي ميناج، سيفطات لينا المغراوي وعمر الحدوشي وتقي الدين الهيلالي والعديد من رموز السلفية والوهابية في المغرب، لي ساهموا في عهد الإنغلاق المغربي والتشدد ومظاهر ولباس المغاربة عمرهم عرفوه، حتى ولينا جزء من الشرق وحتى حنا تعادينا بأمراض الشرق المزمنة، هاعلاش قبل ما تبدى السعودية هاد سياسة الإنفتاح راه خاص نطالبوها بجبر الضرر ديال سنوات وهي كتحقن وتلقن المغاربة إسلامها المتشدد لي هي حاليا كتخلى عليه ولكن المغرب باقي كيعاني منو.