يونس أفطيط – كود///
أعلن اليوم الجمعة بيدرو سانشيز، رئيس الحكومة الاسبانية، عن موعد إجراء الانتخابات المبكرة في البلاد.
هادالإنتخابات مخوفة جميع الجاليات لي فالبلاد وعلى رأسها طبعا لمغاربة لي كاين منهم 800 ألف مغربي، بينهم 230 ألف، خدامين ومسجلين فالضمان الاجتماعي.
ملك إسبانيا لبارح وفمحاولة منه لتخفيف هاد التخوفات، أشاد بدور المغاربة ومساهمتهم في تنمية بلادو، أما وزير خارجيته خوسيه بوريل، فقد اعتبر أن هاد ال800 ألف مغربي، هوما مثال حي على الاندماج فإسبانيا، مؤكدا أنه كيقدموا مساهمات جد فعالة فتنمية البلاد، وعطا المثال ب230 ألف مغربي لي مسجلين فالضمان الاجتماعي.
طبعا الخوف ديال المهاجرين من حزب “بوكس”، لي دار مفاجئة فالانتخابات لي فاتت، وهاد المرة ممكن يطلع فالانتخابات ديال ابريل القادم، وفظل فوبيا المهاجرين يقدرو الصبليون يصوتوا عليه باش يشكل الحكومة، وهادشي لي غادي يخلي المغاربة أول أهدافه.
لمغاربة غايكونو أول أهداف حزب بوكس، حقاش قبل أسابيع كانت انطلقات حملة ضد المهاجرين من طرف هاد الحزب، لي كان كيستعرض التجارب المريرة ديال الإسبان مع المهاجرين، وركزو بزاف على قصة أحد منسقيهم المحليين لي هو حاليا محامي، وكان الاب ديالو تقتل على يد مغربي خدام عندو.
طبعا هاد القصة خلفات صدى كبير فإسبانيا، وهاد القاتل دار جريم خايبة من بعد ماكان كيضرب واحد الكلب جا اسباني يدافع عاب قتلوا، وجا موراه أب المحامي ينقذ الصبليوني قتلوا تا هو، هاد القصة لي ركزوا عليها كتبين المغاربة متوحشين ما كيرحموا لا حيوانات لا بشر، والهدف ديال الحكومة الآنية وملك إسبانيا هو محاولة إظهار الجانب الجيد للمغاربة، باش يمنعوا مد التطرف من الوصول الى الحكومة الإسبانية.
