عمـر المزيـن – مكتب الرباط//
[email protected]

فضيجة جديدة تهز الجامعة المغربية وهاد المرة ضحاياها طالبات كيقراو فالسنة الثانية سلك الماستر بكلية علوم التربية بالرباط شعبة “تدبير الرأسمال البشري والتواصل”، اتهمت جوج منهوم الأستاذ المسؤول عن الشعبة، “ي.ص”، أستاذ التعليم العالي بكلية علوم التربية بمدينة العرفان بالرباط، بالتحرش الجنسي واستغلال موقعه والتضييق عليهن.

طالبة من بين هاد الضحايا قدمت لـ”كود” تفاصيل صادمة على ما تعرضت له بداخل الجامعة. تفاصيل هاد القضية تحكيها الضحية الطالبة لـ”كود” من البداية ديالها. وقالت على أنه شي خلاف كان عندها مع صاحبتها وهاد الخلاف تافه بزاف واستغلو داك الأستاذ وناض يخرجها من قاعة الدراسة، وقالها عايني على برا حتى دير 4 وأجي عندي.

وأضافت الطالبة: “مني مشيت عندو مع 4 قاليا سيري حتى لـ6 وأجي عندي دبا راني خدام وبعدها مني مشيت عندو قاليا نتلقوا حدا لافاك ديال الآداب ونمشيو ف الطونوبيل لكن أنا رفضت وبعدها مني جيت نهضر على المشكل بدا يقيص ليا فيدي ويعنقي وبدا يتحرش وانا خفت”.

وتابعت هاد الطالبة تصريحها مع “كود” بالقول: “شد عليا البيرو وحاولت نتحايل عليه باش تخرج، وهادشي راه طاري لبزاف ديال الطالبات من البرومسيو الاول، وشاد زكاير معاهوم، وقاليا اعطيتيك فرصة لكن معرفتيش تستغليها”.

وماشي غير هادشي. تُضيف هاد الطالبة بنبرات لا تخلو من الحزن، قائلة: “عندي تسجيل صوتي كيقوليا فيه خاصك تقربي ليا ويلا بغيتي نسامحك خاصك تبوسني، ودبا كنطالب ميبقاش هاد الأستاذ مشرف على الماستر ورد الاعتبار ليا، ودبا راه حابسني على قرايتي”.