كود كازا ///
فؤاد عارف مدير قطب امريكا الشمالية فوكالة المغرب العربي للانباء اقوى من مديره العام خليل الهاشمي اقوى من الدولة كلها. علاش؟ السيد سالات مهمتو وحالف لا يرجع. هو ماشي بحال كاع الصحافيين اللي خدمو سنوات ودخلو. اش دار؟ شي صحابو فواشنطن قلبو عليه على يدخل عضوية ادارة نادي الصحافة بواشنطن وقدم راسو اول مغربي والهدرة الخاوية. هاد الشي اللي كيعيش فواشنطن ساهل. شي معارف وها انت فيه.
اخبار اليوم” كشفت انه نشر قصاصة فالوكالة على راسو حقاش عندو سوارت الوكالة يدخل ويكتب وينشر. شافها المدير العام وحذفها. من حقو هو الشاف وحيد ليه صلاحية النشر. هادا مدير ضريف. فالواقع كان يدخلو منبارشة للمغرب
المشكل اننا فالمغرب. اللي وصفاتو “اخبار اليوم” بصراع الاجنحة فالوكالة كيعكس ان شي وحدين كيعتابرو ريوسهم اهم من المدير العام اهم من المؤسسة وعلاش؟ السي فؤاد عارف كيقول لقاصي والداتي راه ماعاي الاميرة. كيقصد سفيرة المغرب فواشنطن جمالة. طبعا هي ما اميرة ما والو هي بنت اميرة اخت الحسن الثاني. ثانيا كيدعي دعم “لادجيد” ليه ومناصرته لها.
ياسين المنصوري باطرون “لادجيد” كان فلاماب. كيعرف باللي شي وحدين يقدرو يدرگو بهاد الشي وخاصو يكون اول واحد يحاربهم حقاش كيضروه وكيضرو جهازو اكثر وكيضرو لبلاد
