كود عادل المكناسي //////

المقاطعة اللي نجحات فالمغرب كل واحد يدير ليها القراءة اللي بغى. اكيد ماشي كاع المقاطعين عندهم نفس مبررات المقاطعة. هي تعبير عن عدم رضى على وضع معين. وضع سياسي مادام الحكومة هي اللي كتوضع السياسات العمومية اللي عندها تأثير على حياة المواطنين اليومية. غلاء الاسعار ماشي مبرر واحد ووحيد للمقاطعة. من الغباء جعلو السبب الوحيد. حتى قضية ان الطبقة المتوسطة اللي ضررات هي اللي نجحات المقاطعة فيها نظر. طبعا مع هاد العنوان لكبير المقاطعة داير بحال السيد اللي كيتزار. كل واحد كيعلق فيه حجابو وكل واحد باغي منو هدف واحد.

اللي بان ان الاحياء الشعبية هي اللي تحركات. شكون حرك هاد الشي كولو. هادا نقاش اخر. دخلات جهات كثيرة ولكن تجمعات كاع الظروف باش تنجح دعوات اللي من شحال وهي كترفع. على هاد القبال كنقول راها تعبير سياسي.

المغرب خرج فعشرين فبراير. كانت مطالب كثيرة. اليسار الراديكالي والعدل والاحسان بغاو يطيحو الملكية. اليسار الاصلاحي والاسلاميين بغاو تعديل دستوري. مغاربة اخرين بغاو تغيير فحياتهم. حرية اكثر وتنمية اقتصادية تبان عليهم. صحاب عشرين فبراير الاصلاحيين هما اللي تحقات ليهم مطالبهم. جا دستور 2011 ومعاه دارو انتخابات اللي ربحاتها العدالة والتنمية وجا عبد الاله بنكيران لرئاسة الحكومة.

اكتشفو لمغاربة سياسي فشي شكل. سياسي داهية. مغربي كيشبههم واخا اسلامي ما بقاش كيوظف الخطاب الديني. كيتواصل معاهم. شجاع ما كيخافش. ما تسناش حتى سالات الحكومة وغبر ومشى لبروكسيل باش يكول كلام عيان ويبين علاش فشلات حكومتو كيف دار الاتحادي عبد الرحمان اليوسفي. وسط المسؤولية قال باللي كاين جوج حكومات. حكومتو وحكومة كتسير فالخفاء. كان كيهدر على بعض مستشاري الملك على دور الياس العماري الامين العام للاصالة والمعاصرة حينها. هاد السياسي كان جريء باش ياخد قرارات ليبرالية بزاف. نتحدى شي حزب كيدعي اللبيرالية فالمغرب ياخدها. همات صندوق المقاصة وتحرير الدرهم او تعويمه =اتخد في عهده وطبق فعهد بنعرفة.

لمغاربة اتفقي معاه او اختلفتي شافو سياسي عجبهم. فهاد الوقت اللي كنا نقدرو نديرو انتقال ديموقراطي حقيقي بدستور فيه الضو الديموقراطي بدات حرب عليه. كلشي شارك فهاد الحرب. ولى بنكيران كيشكل خطورة على مصالح بعض الفئات وبداو كيوهمو باللي خطرو الاكبر على الملك وعلى الملكية. طمئيناتو الكثيرة ما عطات والو. تصرفات فلوس كثيرة باش تشوهو. تقادت حملات كثيرة باش طيحو. تخلقات اخبار كثيرة باش تشوش عليه. ووالو. ديك الساعة كان قوي بشعبيتو. وراه كاينة استطلاعات رأي موجودة وبحزبو اللي وراه. كان محزم بيه.

جهات فالدولة نسات الديموقراطية ونسات كلشي وعاد عندها هدف واحد وحيد هو بنكيران يطيح وحزبو يمشي =كان يصبح ليهم حزب بصاح=. ولى خطاب متخلف كيروج. علاش كاع هاد الديموقراطية. علاش ما يوقعش تعديل دستوري ونحيدو كاع الملك يعين رئيس حكومة من الحزب اللي جا الاول. علاش ما نديروش تعديل دستوري باش ما يبقاش التعيين فالمناصب العليا =رجالات الدولة= بيد المجلس الحكومي. علاش وعلاش. هاد الجريمة شاركات فيها احزاب كتكذب على لمغاربة وكتقول راها ديموقراطية.

فشل هاد المخطط. جابو الياس العماري ومعاه مشروع كولو فشل. جات الانتخابات البلدية ديال 2015. كانو معولين يديو المدن. المخطط هو ما يديوهاش العدالة والتنمية وصافي. ربح بنكيران ماشي البي جي دي 39 مدينة كبيرة. كاع المدن الكبرى داها. مخطط الاطاحة بيه تسرع اكثر وبدات الاخطاء لكبيرة. اشاعات اخبار ملفقة ما بقاتش شادة امام شعبية بنكيران. جا عبقري زمانو ودار مسيرة ولد زروال قبل انطلاق الحملة ديال الانتخابات التشريعية. يومها هانو كاع لمغاربة. بنكيران قال “بلا ما نديرو اليوم حملة انتخابية” عرف باللي رابح الانتخابات التشريعية ل2016. طبعا هادا ما كان واخا الدولة عبر وزارة الداخلية نزلات بكل قوتها. كلشي عاقل كيفاش خرج وزير داخلية يوم الانتخابات غلط باسم الحزب ومن بعد هددو. كلشي عرف باللي كاين مخطط ثالث ورابع وخامس. كاينة رغبة باش بنكيران ما يرجعش.

فهاديك الفترة بدا حراك الريف فمدينة مهين عليها البام او الداخلية دارت كلشي باش تعطيها ليه. ما خلاوش الحكومة تقرب لهاد الملف. حقاش النهار الاول باش توقع علي مشروع “الحسيمة منارة الريف” ما عرضوش ما خبروش رئيس الحكومة. بنكيران كان دار تصريح ل”كود” على هاد الاقصاء. مشروع ما عمرو تناقش فمجلس حكومي وداز الوقت وتمت معاقبة وزراء بعينهم ماشي كلهم عليه.

حراك الريف لعب فيه البام وبالاخص الياس العماري. فالمحاكمة اثير ما اثير حول الموضوع. ثم كان معطى اخر وهو نوع من الانتقام فبعض المناطق على اللي صوت علي البي جي دي. شفنا فضايح كثيرة.

حراك الريف غادي يتقوى ويولي خطير والحكومة مبلوكية ما مشكلاش. طورات الامور وخرجات على السيطرة وولات المطالب انفصالية. بحال كاع الاحتجاجات اللي ما كيتهمش علاجها فحينها. سكان الحسيمة حسو بالحكرة ماشي غير على التهميش بل على الوصاية عليهم من قبل بعض تجار السياسة اللي كانو معدومين وولاو مليارديرات وما بقاوش ساكنين فالريف.

من بعد المغرب عرف احداث جرادة. بسطاء فقراء احتجو على فقرهم على مناجم كل نهار كتقتل فيهم شي واحد. تعرضو للضرب. احتقان اخر قلق لمغاربة. مدن اخرى شهدت حالات من الاحتقان. بدا المغرب كيتحرك.

من اسباب هاد الحراك هو الاحساس بالغبن. صوتو على بنكيران داروه ودارو فيلم باش ما يكونش وعوض يخرج حزبو للمعارضة قبل بتعيين ضعيف الشخصية اسمه بنعرفة او سعد الدين العثماني. جابوه يتحكمو فيه. حتى البلوكاج اللي دام اشهر تحل فايام. الفرشة وصافي. هادوك اللي بغاو بنكيران يحيد حيدوه وبدعم اساسي من حزبو ولكن نساو المجتمع. اعتقدو ان الامور غادية تكون ساهلة مع بنعرفة.

بالفعل محكمين فيه ولكن درجة الوعي عند المجتمع كبرات. حس بيهم شمتوه. حس بيهم كيضحكو عليه. عبر على رفض هاد الشي بالمقاطعة بالفايس بوك. دابا وصلنا لمرحلة الجسد المغربي مريض. كاينين شي علماء كيقولو راه ممكن العلاج بتعيين عمال او ولاة جدد. كاين شي وحدين كيكرهو المغرب كيقولو ونقولو للبام والاستقلال ديالنا بعد ما جابو ليه نزار البركة يدير ملتمس الرقابة ويطيح الحكومة. البعض كيقول وعلاش ما تكونش انتخابات سابقة لاوانها. هاد الشي كولو ما غاديش يحل المشكلة. المشكلة لكبيرة هي ان اي عملية جراحية لبتر عضو فجسد مريض كتكون وراها مخاطر كثيرة. خاص اولا الجسد يتعافى. ترجع فيه الروح. هاد الشي اللي واقع عندنا.

هاد الحكومة رغم ضعفها رغم تناقضاتها الداخلية رغم خلافاتها خاصها تكمل ولايتها. من بعد خاص انتخابات تشريعية ما تكونش الداخلية هي المشرف عليها. خاص لجنة خاصة مستقلة. اللي عطاتو الانتخابات خاصو يتحتارم ديموقراطيا ماشي دستوريا فقط. كيفاش الامين العام للحزب الفائز هو رئيس الحكومة ماشي غيرو. كيفاش بنكيران يربح يعرق يحفي الصباط يدور يخطب يسافر ……. ويجي واحد بحال بنعرفة يكون رئيس حكومة. وفوق هاد الشي ما يبقى يدخل حد فتشكيل الحكومة. رئيس الحكومة مع هاد التحولات اللي عارفها لبلاد خاصو يكون عندو بالاضافة الى الشرعية الشعبية ديال صناديق الاقتراع٬ شخصية قوية قادرة على التواصل مع الشعب على المواجهة.

بنكيران كان قال مرة ملاحظة على هاد الاصلاح السياسي. قال فيها ما معناه خاصنا نعرفو مهام مستشاري الملك. اييه خاص تحديد مهامهم بوضوح تام. السيد عندو تجارب وعارف اش كيقول.

بلا هاد الشي ما غادي نوصلو لوالو. المغرب غريب. كيكون قريب من دخول نادي الديموقراطيات وكيخرجو شي عباقرة باش يخرجوه. غالبا ما كانو باغيين يديرو انقلاب على الملكية واليوم ولاو ملكيين اكثر من الملك.