نهاد فتحي كود ////

مني كنسمع تصريحات هيئة دفاع الضحيات فملف توفيق بوعشرين، كيتخيل ليا عايشين في مغرب طوباوي. مغرب بطل فحقوق الإنسان عامة وحقوق المرأة خاصة. مغرب كتخاد فيه المعانات و الحڭرة بجدية. مغرب كيتعاقب فيه المتسلط و كيتحمى فيه المظلوم.

بلا ضحك، خاص المحاميين يبداو يديرو خدمتهم بالسكات حيث هادوك التصريحات السريالية كيدفعوك تعاطف مع المتهم واخا تكون باغي فيه الخدمة.

كيفاش زعما “واخا يكون تراضي بين الطرفين، يعتبر اغتصاب حيث هناك علاقة سلطة”؟ و هادوك للي تجوجو بالرؤساء ديالهم و بداو علاقة حب فمكان العمل — بما فيها من تعبير جسدي عن الحب للي كنسميوه النيك — حتاهوما تغتاصبو؟ واش المرأة كائن رخوي و غبي لهاد الدرجة ما كيعرفش يڭول “لا”؟ إلى كانت المرأة مكتقدرش ترفض أن تمارس عليها سلوكات كتفرضها، إذن فعلا ناقصة عقل و ما كتستاهلش المساواة والمسؤولية. بهاد المنطق، خاصنا نرجعو سنين اللور و نحيدو للعيالات حرية الاختيار و نحطو مصيرهم بين أيدي أولياء الأمور ديالهم و نخليوهم هوما للي يقرو واش يتجوجو و معامن، و إنى وقت يخرجو و معامن، و واش يقراو و فين. حيث المرأة لا حول و لا قوة لها، خاصها تحمى من خطورة العالم للي داير بيها.

تيڭولو بللي المغاربة أذكياء و عارفين شنو كاين. راه فعلا المغاربة ماشي حمير و كيتعاطفو معاك إلى عضك الحنش المرة اللولة، و لكن إلى عودتي لعبتي بنفس الحنش تيسميوك غبي و ساذج و كيضحكو عليك. راه مايمكنش تدخل ليهم لدماغهم أن مرأة حرة كتحتارم راسها غادا تخلي شي قضيب ماشي ديال راجلها يدخل فيها و ينطح ليها راس الجنين للي هازة فكرشها. تقدر تكون المرة اللولة اغتصاب، و لكن إلى تعودات بزاف ديال المرات راه القضية فيها إن. الله ينعل بو الفلوس، شحال غادي يكون يخلصها ڭاع باش تقبل بهاد الذل؟ أي وحدة طرا ليها هاد الشي خاصها تخشي ليه صباطو فالمؤخرة ديالو و تڭولها لراجلها باش يكمل عليه. راه كترخصو العيالات بهاد الطريقة و كدخلو الشك فرجالاتهم و كتهينو ڭاع هادوك لرفضو الذل و اختارو يعومو فالفقر عوض ما يوليو آلات استكفاتية لرؤسائهم. و زايدون، عاد ولا كايجيكم الاغتصاب جريمة بشعة خاص يعاقب عليها القانون بصرامة؟ فين كتكونو فاش الدريات كيقتلو راسهم و لا كيوريوكم آثار الضرب و الجرح و واخا هاكاك مكتيقوهمش؟

أحسن حاجة يمكن تطرا لبوعشرين فهاد الملف هي يتبث تراضي الضحيات و يتحاكم الحزاق كامل بتهمة الفساد، للي أصلا خاصو يتحيد من القانون الجنائي حيث ما بقات عندو حتى علاقة بأسلوب عيش المغاربة، و لكن مخليينو و حاطينو فوق ريوسنا كسيف ديموقليس ينزلوه علينا وقت ما بغاو إلى ادعت الضرورة.

حاكموه فحدود الحجج للي عندكم و ضربوه حتى بالمؤبد إلى كان فعلا كيستاهل. و لكن هنيونا من الضحك على الذقون