كود هناء ابو علي الرباط ////
نشرت “ماگريب انتيليجانس” الاسبوع الماضي خبرا عن امكانية تعيين ياسين المنصوري مدير “لادجيد” المخابرات الخارجية وزيرا للخارجية والتعاون باش يعوض ناصر بوريطة. لكن واش ممكن المنصوري اللي قرا مع الملك محمد السادس بحالو بحال فؤاد علي الهمة مستشاره٬ ممكن يولي فهاد المنصب.

فالمغرب هاد الشي ماشي مستبعد. لكن فوضعية المنصوري وبوريطة كاينة مؤشرات تجعل هاد الشي مستبعدا. غادي نقدمو ف”كود” 5 فقط.

1
بوريطة ديناميكي بفريق ناشط
اولا مرتبطة بعمل الخارجية الحالية اي عمل ناصر بوريطة وفريقو. هاد الفريق خدام مزيان. ناشط. ديناميكي ومتحرك. من الغباء تزعزع فرقة غادية مزيانة وما دارش شي زبلة تستحق. تغيير الخارجية فهاد الوقت ضرب لهاد الدينامية

2

سيدياو ماشي ملف بوريطة بوحدو

كلشي باغي يمسح فشل التحاق المغرب بتجمع اقتصادي لدول غرب افريقيا “سيدياو” فخدمة ناصر بوريطة فالخارجية. هاد الملف ماشي ديال بوريطة بوحدو. اييه كيهم السياسة الخارجية المغربية ولكن الشق المتعلق بتهيئ الظروف والعمل وجمع المعطيات ماشي خدمة الخارجية بوحدها بل خدمة “لادجيد” كذلك. ايلى كان شي فشل٬ راه ما كيتحملوش ناس الخارجية بوحدها بل لادجيد

3
تعيين المنصوري غادي يحرج ويفرش خاصة فافريقيا
خدمة المخابرات فالعالم جمع المعطيات وتحليلها. فهاد العملية ديال الجمع كاين تعاون مع ناس كثار. ممكن غدا تولي وزير الخارجية وتتعامل مع ديبلوماسيين كانوا خدامين معاك او العكس. هاد الشي ما غاديش يعاونك فخدمتك، غادي يعقدها. اييه ممكن لمدير المخابرات يولي رئيس دولة بحال بوتين بحال غيرو ولكن على رأس الديبلوماسية صعيبة ومحرجة لدولة باغية تركز على افريقيا. اكيد مدير المخابرات الخارجية كيعرف عدد من رؤساء الدول من كبار المسؤولين معرفة فظروف خاصة فيها امور خاصة جدا لا هادوك المسؤولين لا المغرب يبغي للديبلوماسية المغربية تضرب فهاد الوقت

4
تقليل من المنصوري كذلك
ايلى وقع هاد التعيين راه فيه ضربة للمنصوري كذلك. شحال من عام وهو كيوجدو رجل دولة بحالو. فالاخير يخرج للواجهة يخرج للديبلوماسية بكل تعقيداتها راه تقليل من شأنه ماشي ترقية ليه. رجالات الدولة بحالو كتكون بداية للنهاية. مواجهة الاعلام والازمات اللي معروفة كتوقع فالديبلوماسية

5
الوضع السياسي فالمغرب يصعب تعديل حكومي
الوضع السياسي فالمغرب من نهار جات حكومة بنعرفة وهو فشي شكل. تعديل داز بعد الزلزال السياسي وممكن جدا يوقع تعديل فالخارجية غير هو غادي يزيد يربك هاد الوضع. وضع هشيش بزاف. ايلى بغاو يتخلاو على بنعرفة راه ماشي بهاد الطريقة.

طبعا هاد المؤشرات كتبعد المنصوري على المنصب لكن فالمغرب كلشي ممكن يوقع.