وكالات-كود//

طلب شاب روسي سميتو “شاكور” الزواج من الحبيبة ديالو ، واخا كانت غادي تصفيها ليه بالطعن 13 مرة بواسطة سلاح أبيض، بحيت وأثناء محاكمتها بالتهمة فمحكمة “نيجنكامسك” في “تتارستان” بروسيا، توسل للقاضي اللي كان غادي ينطق بالحكم ضدها، باش يعفو عليها ويتساهل معاها حيت تافقو يتزوجو وباغيين يديرو عرس.

وقال المدعي العام الروسي: أن “المتهمة قربات تصفيها ليه كون ماشي الظروف والهرب ديالو للحصول على المساعدة الطبية فالوقت المناسب ، وقال على أن علاج الضحية استغرق 3 ديال الصيمانات باش يبرا من الجروح المنتاشرة فالجسم ديالو ، وطالب باش تسجن ل6 سنوات، بتهمة إلحاق الضرر العمد وتهديد حياة رجل”.

ونكرات المتهمة نيتها فقتل حبيبها، وبررت هادشي لي دارت بكونها كانت سكرانة، وماتذكرش سبب الخلاف بين الطرفين، وقرر القاضي تأجيل النطق بالحكم لحين انعقاد جلسة استماع مستقبلية.