محمد سقراط-كود///
أولا تحية للزميل عبد الرحمان البصري على التغطية المتميزة ديالو لمنطقة الرحامنة العظمى وكنتمنى مستقبلا تشمل هاد التغطية قيادة نزالة العظم وبالخصوص دواوير خيام النويني وخيام الرباعة والزاوية المحمودية وخيام الرضواني وبهداد ودراع الزيتون وآيت ياسين وبمناسبة تغطيته لمنع عامل اقليم بنكرير لرؤساء الجماعات يتقداو الحديد الجديد باش يبقاو يطيرو في المزرار على الناس لي صوتوا عليهم، وأصلا في الرحامنة وفي كاع المغرب بلاتنا الديمقراطية برؤساء جماعات من هاد النوع، لي كان شحال هادي في نزالة لعظم صلح الطريق غير لدوارو وللدواور لي صوتو عليه الدواور لي ماصوتوش راهم ليومنا هذا كيعانيو حتى طريق بالتفنة ماتقاداتش، الدواور ديالنا نيت باقي معندهمش طريق غير بيست بالتفنة هي اللخرة مكايناش، وهادشي جاري بيه العمل في المغرب كامل كأن الإنتخابات والمنتخبين فيروس ووباء أشد فتكا على الميزانية وعلى البلاد والعباد من كورونا وإيبولا وحتى السيدا.
دابا بلاد كتدير إنتخابات نزيهة والمواطنين كيختارو شكون يسير الجماعات والمدن ديالهم، وغير كتسالى الإنتخابات كتبدى واحد السلسلة ديال أحداث النهب اللامتناهي للخزينة سواء قانونية أو غير قانونية، وخاص العامل و الوالي والداخلية يبقاو واقفين ليهم عند راسهم وحاضيينهم، ولاة وعمال صاحب الجلالة حاضيين المنتخبين لي ختارهم الشعب باش مايطبوش ليه رزقو ويديرو لاباس على ظهرو، إذن بهاد المنطق الإنتخابات راه وباء وبلاء لهاد الشعب وهاد البلاد، ماعندها معنى نبقاو نديرو انتخابات وأحزاب كتكلف الدولة والشعب الملايير باش في اللخر خاص الداخلية تبقى حاضياهم ويبقى تابعهم الفتيت بالمذكرات، وهوما ماخلاو غير لي نساو كاع تضارب المصالح داروه.
واحد العام جماعية العطاوية كانو بغاو يديرو شي دراسة على تهيئة الجماعة مشاو عند مكتب فرنسي دارها ليهم بمية وعشرين مليون وهوما كانو يجيبو أستاذ باحث ومعاه الطلبة ويديرو خدمة بحالها أو حسن، والمشروع أصلا كان غير بشي 300 مليون باقي حتى مابداو خسرو عليها عليه مية وعشرين غير دراسة اذن صافي مشات فلوس المشروع، هادشي غير مثال بسيط من بزاف ديال إنعدام المسؤولية والوطنية عند العديد من المنتخبين ولي بالنسبة ليهم المنصب هو همزة للإغتناء، فاش شي مدينة كتقدم وتحضر وتصلح ويبداو فيها المشاريع والقرارات الحكيمة في الغالب كتكون جايا من الوالي بحال اليعقوبي كمثال المدينة لي مشا ليها كيصلحها، في المقابل عمرك تسمع شي منتخب أفاد المدينة ديالو أو القرارات ديالو بانت بشكل إيجابي على حياة المواطنين في مدينتو أو جماعتو، إذن لاش هاد الفريع ما دام أن الخايبة من المنتخب والزينة من والي وعامل وقايد صاحب الجلالة نكتفيو غير بالزينة والخايبة نحيدوها.