كود هناء ابو علي ///
البارح جاو مسؤولين ليبيين للمغرب. جا عقيلة صالح، رئيس البرلمان الليبي، وخالد المشري، رئيس المجلس الأعلى للدولة الليبي.
وزير خارجيتنا ناصر بويطة اللي ما كيخلي حتى مناسبة دوز باش يخرج للاعلام٬ ضرب الطم. خرجو بيان وصافي.
التصريحات الصحافية ما دارهاش هو دارها لحبيب المالكي رئيس مجلس النواب وحكيم بنشماس رئيس مجلس المستشارين.
هاد وزير الخارجية اللي تخلى على لغة الديبلوماسية وولى فقاموسو بحال ايلى وزير الحربية٬ لعب دور اساسي فالتصعيد مع اسبانيا.
فاللول كنا غاديين مزيان. دولة كتقول كدافع على قرارات مجلس الامن الدولي فقضية الصحرا. اللي هي اسبانيا. استضفات بالتخبية زعيم البوليساريو اللي تحدى قرارات مجلس الامن الدولي نيت فقضية الكركرات وفقضية ما يعتقد انه حرب على المغرب.
دخلوه بالتخبية بلا ما يخبرو اول شريك اقتصادي ليهم فافريقيا اللي كيصدرو ليه كثر من 44 بالمائة من صادراتهم. هاد الشي ما راعاوهش. خرج بيان اول لينا. مزيان.
المشكلة كانت فاللي خدا قرار السماح ل10 الاف مغربي يدخلو عبر الحدود مع سبتة. هنا بدا التدبير الكارثي فالتواصل بعدا.
دابا عقلتو شحال من بيان كان كيخرج بوريطة. شحال من تصريح. شحال من حوار. تناقضات وتخربيق. توظيف معجم حربي ما عندو علاقة بالديبلوماسية.
اليوم خرج ابراهيم غالي زعيم البوليساريو من اسبانيا ومشى لحاضنته الجزائر بعد ما استامع ليه قاضي اسباني. خرج ليلة 1 و2 يونيو. عقلتو نهار 31 ماي بوريطة خرج جوج بيانات. جوج فنهار واحد. سب الاجهزة الامنية وحملها المسؤولية فسقطة من سقطاتو
خلق انتظارية عند لمغاربة بللي غاديين لتصعيد اكبر. فاللخر دخل سوق راسو. ما بقيناش سمعنا عليه. لا شفناه. بيان اللي فيه ان الملك وافق على ارجاع جميع القاصرين من اوربا فيه نوع من التصحيح لخفة هاد لوزير. لتهوره.
ايلى لاحظو ان الوزير المكلف بالاجهزة الامنية عندنا فالمغرب: عبد الوافي لفتيت ولا عند اسبانيا مارلاسكا كانو ديبلوماسيين بزاف طيلة هاد الازمة. اللي المفروض فيهم التصعيد كانو كيعرفو يوظفو الكلمات.
بينما اللي مفروض فيه الديبلوماسية كان وزير للحربية. دار تصعيد. فالحكومة الاسبانية كان فمستوى وزيرة الدفاع مارگريطا روبليس. حتى لايا گونزاليث اللي كانت سباب هاد الازمة ضربات الطم ورجعات اللاور وخلات اخرين يهدرو. باش كتنقط كتفادى التصعيد وكتعاود اش كيقولو وزراء هاد الحكومة.
ما يمكنش الديبلوماسية ديالنا تسير من قبل واحد خف من رزقو وباغي غير المواجهة. اليوم ولينا فوضعية صعيبة. لمغاربة كانو كيعتاقدو باللي عندنا شي ورقة صحيحة نخرجوها فالوقت المناسب. لقينا عندنا غير وزير ناقصاه الديبلوماسية
