عفراء علوي محمدي- كود//
راسلات وزارة التضامن والتنمية الاجتماعية والمساواة والأسرة مدير التعاون الوطني، باش يعبئ وحدات حماية الطفولة عامة وفرق المساعدة الاجتماعية للأطفال المتشردين خاصة، ووضع فرق خاصة فالأقاليم اللي مافيهاش هذ الوحدات، باش تكون فمتناول الأطفال، وتستقبل اتصالاتم على العنف والاستغلال اللي كيتمارس عليهم، بتنسيق مع الفاعلين المعنيين.
وطلبات الوزارة من مدير التعاون الوطني باش يتم وضع أرقام هواتف وحدات حماية الطفولة رهن إشارة السلطات المحلية، باش يتوصلو بمعلومات حول هذ الأطفال، ويقومو بالتنسيق مع مندوبيات التعاون الوطني ومؤسسات الرعاية الاجتماعية المتخصصة، من أجل تقديم الدعم الملائم ليهم، أو مساعدتهن على الالتحاق بأسرهم، أو إيواؤهم عند الاقتضاء.
وبالنسبة للأطفال اللي كيلقاو صعوبة فالتكيف ففترة الحجر الصحي، طالبات الوزارة المدير باش يخصص فريق ديال الاختصاصيين النفسيين والإكلينيكيين باش يتلقاو مكالمات ورسائل هذ الأطفال، من اجل تقديم خدمات الدعم النفسي ليهم، بالإضافة لتقديم استشارة للمربيين الإداريين فالخيريات.
