مافهمش هاد الناس هادو منين جاو ؟ فين كبرو ؟! وواش ماكايتفرجو فتلفزة ! ماكايسمعو خبارات ؟ ماملاحظينش بأنه العالم كامل غادي نحو اعطاء مجال اوسع للحريات الفردية و بأنه الدولة الحديثة هي دولة مواطنين ! كاتعتارف بيك كمواطن و كفى ! ماسوقهاش هي فشنو كادير بترمتك و لا اشمن دين كاتعتانق !
ولكن اللومة ماشي على المحامي ! المحامي راه غير وجه مشوه من اوجه النفاق السياسي لي كاتمارسو الدولة لي كاتلعب على وتر الدين فاش كايسلكها باش تجر الشحيمة لشعيبة ووتر الحداثة فاش كاتكون باغا دير الماركوتيغ لراسها قدام الاتحاد الاوروبي و المنظمات الدولية ! المحامي راه غي صوت للقانون لي كايجرم لحد الساعة العلاقات المثلية ! و طول ما الدولة ماباغش تحسم فهاد المسألة و كاتنقز بين الحبال بجوج طول ما غايخرجو لينا ديما اطر و دكاترة و مهندسين و محامين قارين و ووصلو لمناصب عليا و لكن الدماغ مطمس بالافكار الظلامية و الاقصائية تجاه الآخر !
واش كاينة شي دولة حديثة بعقلها مازال كاتجرم المثلية و كادخل لعباد الله فتراميهم !؟ واش كاينة مازال شي دولة محترمة كاتدخل لعباد الله فمعتقداتهم الدينية ؟! ماكانظنش ! الليستة ديال الدولة لي مازال كاتحارب الحريات و تعاقب العلاقات الجنسية للاشخاص و تتحاسب مع مواطنيها على شنو كايديرو بتراميهم راها جامعة غي النطيحة و المتردية و ما اكل السبع ! الدول ديال الله يحسن العوان لي ماكايقدوش يگابلو مصالح المواطنين و يحسنو ليهم المعيشة و يقلبو ليهم على تعليم احسن و صحة احسن و يرقاو بيهم … و باش يبانو راهم خدامين كايقابلو الحياة الشخصية للافراد!
هادشي علاش المغرب خاصو يقرر و يوضح النموذج ديال الدولة لي باغي يبني فالمستقبل حيت مايمكنش نبقاو عايشين بموديل هجين ماحنا مع صحاب السما ماحنا مع صحاب الارض ! مايمكنش فاش نديرو الاشهار للمغرب نصورو موروكومول بالدرون و متحف محمد السادس و ميناء طنجة ميد و الباراجات و الجسور و فيستيفال موازين و الموسيقى الروحية و الملك ديالنا كايقولينا ” انا أمير المؤمنين باختلاف دياناتهم” و كايحذرنا من الارهابين لي كايهاجمو الحريات فاش كايقول ” ان الارهابيين يستعملون كل الوسائل لضرب المجتمعات المتشبعة بقيم الحرية و الانفتاح و التسامح”
و فاش نجيو لارض الواقع نلقاو محامي منتمي لوزارة سميتها ” وزارة العدل و الحريات” كايهضر على مثلي فحالا غي حيت مثلي راه ماعندو حق تحميه الدولة و توفر ليه العدالة.