كود كازا//
اوقف رئيس الحكومة خاصية التعليقات عندو ففيسبوك، بنعرفة صافي مابقاش كيقدر على النقد وتفاعلات المواطنين مع قراراتو وبلاناتو العوجة، وهكذا قرر يسد هذ الباب اللي كتجيه منو الريح ويستريح. مصدر ل”كود” قال باللي عندو علاقة بهجوم غير مفهوم تعرض ليه حسابو. واضاف باللي كاين تعليقات وتجاوب مازال مستمر
ومواطنين كثار على مواقع التواصل الاجتماعي استنكرو هذشي، واعتبرو ان فيه مصادرة لحقهم فالتعبير
وهذشي دارو العثماني فالباج ديالو ففيسبوك، بعد ما كان قبل بايام حضر خاصية التعليق عندو ف”أنستكَرام”، لكن لحد الساعة تويتر ديالو باقي محلول.
ممكن يكون الفريق اللي مكلف بالصفحة ديال رئيس الحكومة طلعلو الدم من انتقاات المواطنين بشان شطحاتو الأخيرة، من بعد ما راسل حماس اللي كتعتبر دولة إرهابية، وعاير إسرائيل، فالوقت اللي كان فرحان وناشط قبل بالتطبيع.
الفريق كيأكد ويعاود باللي هاد الشي ما عندو علاقة بالقدرة على تقبل النقد بل بهجومات كثيرة من حسابات وهمية. دابا وفق الفريق راه كلشي مفتوح
