عمـر المزيـن – مكتب الرباط//
نقاش كبير كاين وسط التجمعيّين هاد الأيام على الوزير السابق محمد عبو، القيادي البارز في صفوف حزب التجمع الوطني للأحرار. عبو هادي أيام وهو غابر على الأنشطة الحزبية وكاين اللي قال أن السيد مشا بحالو ومقلق شويا من قيادة الحزب لكن هادشي مكاينش منو بشكل نهائي.
عبو الوزير السابق اللي كان مكلف بالتجارة الخارجية هضرات معاه “كود” على هادشي لكن استغبر من هاد الأخبار التي يتم الحديث عنها بقوة، مؤكدا أن كل ما في الأمر أنه منكب على عدد من المشاريع اللّي تأخرات بتاونات على اعتبار أنه رئيس الجماعة القروية “بني وليد”، وكان فمهرجان الكرموس، مشيرا إلى أن هادشي تزامن مع اجتماع المكتب السياسي اللي كان فأكادير.
وفي نفس السياق، أقر القيادي التجمعي عبو، في تصريح لـ”كود”، أنه هضر مع رئيس الحزب عزيز أخنوش هادي اكثر من شهرين باش يمشي يقابل شويا إقليم تاونات، سيما أن الانتخابات المقبلة مابقة ليها والو، ويشوف شي منسق جهوي جديد للحمامة بجهة فاس مكناس، نافيا بشكل مطلق أن يكون قدم استقالته من الحزب كما يتم الترويج لذلك.
وأضاف عبو: “فكرت نمشي من التنسقية بعد استشارة مع الإخوان بالجهة والناس ديال فتاونات طالبيني كول ساعة وهادشي قلتو للرئيس، حقاش اعطيت شويا ديال الجهد للجهة وانسيت إقليم تاونات وهادشي خلا الناس ديالي تتآخد عليا، وهادشي وصلو للرئيس وهضرت معاه وشرحت ليه، وقلت ليه يشوف شي حد يكون مكيديريش الانتخابات كاع ومتفرغ باش يشد التنسيقية”.
وأوضح عبو أن هاد النقاش العمومي اللي كاين دبا على التعديل الحكومي خلاه ميمشيش من التنسقية الجهوية للحزب باش ميقولوش أنه كيدير الشونطاج مع الرئيس او تكون شي قراءة أخرى، مضيفا: “أنا عمري فكرت نتشفا فحزبي والرئيس راه عراف هادشي، وكان من الضروري نمشي نتفرغ لتاونات حقاش من غدا نتسحاب مع المواطنين فالانتخابات الجاية”.
