كريم الشركي-كود///
لبارح دار المستشار البرلماني عن حزب الاصالة والمعاصرة الكاملي، سؤال موجه للوزير امكراز بخصوص الاجراءات لي دارتها الدولة على كورونا فرمضان.
وقال بأن هاد الاجراء تسبب ففقدان الكثيرين لمصدر قوتهم اليومي، وهضر هضرة مزيانة ولكنه فالاخير طبز ليها عينها، وخلا للوزير امكراز فين يشد فيه.
البرلماني قال فسؤالو أن ثلاثة مليون ونص دالعمال المغاربة غير مسجلين فالضمان الاجتماعي، وهي الارقام لي ماعندهاش أساس من الصحة وهادشي خلا امكراز يضحك على الكاملي وقاليه ماعرفت منين جبتي هاد الارقام.
مصادر ل”كود”، قالت ان رئيس الفريق عادل بركات، هو لي زلق الكاملي فهاد الارقام والمعطيات الخاطئة وخلاه يرجع ضحكة بين زملاؤو، متساءلة، واش ماوصلش الوقت لي يخلي الدولة تعيد النظر فشروط الترشح باش ماشي اي واحد يطلع أمام الأمة ويبقى شد يا فم ولوح فالارقام والمعطيات بدون اي تمحيص.
