گود سبور//

برمجت العصبة الوطنية لكرة القدم الاحترافية ماتشات الدورة 26 من بطولة القسم الأول، وقررت تأجيل ماتش الرجاء الرياضي ونهضة بركان اللي لاعبين كأس الكونفدرالية الأفريقية، وحددت موعد ماتش البركانيين ضد فريق الجيش الملكي برسم سدس عشر نهائي كأس العرش اللي كان مؤجل حيث لبراكنة كانوا لاعبين كأس الكاف.

وقررت العصبة الوطنية لكرة القدم الاحترافية، باش تلعب الجولة 26 من البطولة ما بين الجمعة 26 أبريل والاحد 28 أبريل، وغتبدا بماتش شباب السوالم ومولودية وجدة نهار الجمعة، والسبت 27 أبريل كاين 3 الماتشات ديال المحمدية ضد التواركة مع 5 لعشية فالمحمدية، وحسنية أكادير ضد الجيش الملكي المتصدر مع 7 العشية فأكادير، وأولمبيك آسفي ضد اتحاد طنجة مع 9 الليل فأسفي.

أما يوم الاحد 28 أبريل غيتلعبو فيه 3 الماتشات ديال الفتح الرياضي ضد نهضة الزمامرة فالرباط مع 5 العشية، والمغرب الفاسي ضد الوداد الرياضي مع 7 العشية فمدينة فاس، والمغرب التطواني ضد يوسفية برشيد مع 9 الليل فتطوان، وبالنسبة لماتش الرجاء الرياضي ضد نهضة بركان تأجل حتى لوقت آخر، مع العلم أن العصبة حددت موعد ماتش نهضة بركان ضد الجيش الملكي فسدس عشر نهائي كأس العرش اللي كان مؤجل، وغيتلعب نهار الخميس 2 ماي مع 8 الليل فمدينة بركان.