محمد سقراط-كود///

في البدأ كان الوضع متحكم فيه، أي مسؤول غادي يهدر على كورونا أي خبر في التلفازة أو الراديو أو موقع ديما كيختموها بالوضع متحكم فيه ، ديك اللعبة ديال هاحنا شادين كورونا من القرجوطة وحاكمينها وكتحرك تحت عينينا، سدات لبلاد ثلت شهور، الإقتصاد قوادات عليه، عدد الإصابات حقا بقا قليل ولكن في نفس الوقت الخطاب ديال متحكم فيه بدا ينقص وبداو معاه الإقالات الكثيرة هنا ولهيه، جهدنا ديال الحجر درناه المنحنى ماتسطحش كورونا مامشاش الوضع كان متحكم فيه غير عندهم، تحيد الحجر الصحي ولكن بلا توعية بلا الصرامة في تطبيق شروط الوقاية، علما أن المخزن راه تلت شهور وهو في الزناقي كينصح ويوعي الناس وهوما كيبكيو علاش الجوامع سدو، وباغين يجريو على كورونا بالدعاء في الزناقي، حتى عيى وطلق اللعب وعول على المسؤولية الفردية والنتيجة هي تناكت بالمزيان.

حاليا الوضع غير متحكم فيه سواء وضع الفيروس أو وضع المغاربة لي خارجين للزناقي يدورو بلا كمامة بلا تعقيم كأن هاد الأرقام لي فايتة الالف يوميا لي كتسجل لاتعنيهم، وبحال الى هادو لي كيموتوا يوميا ماشي مغاربة وماشي معاهم في نفس البلاد، بنادم طالقها تسرح حتى كتلقاه كيبكي قبالة شي سبيطار كيتسنى تحاليل كورونا، أو معادي واليديه وتوفى واحد فيهم وتلقاه معربط فالسبيطار وكيتاهم الأطر الطبية بالإهمال وهوما السباب باش مات باه، السبب طبعا راه هو كورونا فيروس خطير بزاف ودمر البلدان المتقدمة العظمى وقتل فيها بزاف ومالقاو معاه حل، وهادشي لي خاص يعرفوه المغاربة وتوصلو ليهم الدولة، راه هذا فيروس خطير وماشي أي واحد جاه راه غادي يمشي يدوز جوج سيمانات واكل شارب فالحجر الصحي ويخرج صح من ظالم.

بحال كي كانت الحكومة فاللول كتذكرنا فكل مناسبة بلي الوضع متحكم فيه تخرج دابا وتعلن أن الوضع غير متحكم فيه أو الناس لي جاهم كورونا فاللول عندهم الزهر وأن هادي الوقت فين خاص يحضيو المغاربة راسهم كثر ماشي العكس، فاللول ديال كورونا جوج سيمانات وانا نقلب على الكمامة باش لقيتها والمعقم ماتلقاهش للدوى ومع ذلك كان كولشي بالكمامة في الزنقة والناس حاضيين راسهم والتباعد الإجتماعي ديال بصح، دابا فين مامشيتي المعقم كيتباع وبثمن قل من اللول ومكياخدو تاواحد الكمامات بالأنواع والأشكال موجودين فأي بلاصة ومع ذلك قليل لي دايرهم كيف ماخاص، هادي هي الوقيتة فين خاص الحكومة تكون عندها الشجاعة وتعلن أن الوضع غير متحكم فيه وأن لي جاتو كورونا دابا وصحتو على قد الحال راه احتمال كبير يموت وأن دابا فين خاص يكون التباعد الإجتماعي بصح والكمامة وأن الوضع دابا أخطر من اللول ديال كورونا بمراحل كثيرة.