كود سبور//
عبرت مكونات نهضة بركان على شكرها لگاع المغاربة، اللي وقفو مع الفريق أمام الاعتداء السافر ديال السلطات الجزائرية، اللي حجزت على الفريق وخرقت قانون الكاف، وبغات تبزز على الفريق يلعب بتونيات مزورين ما فيهمش خريطة المغرب فذهاب دومي فينال كاس الكونفدالية الأفريقية، وهذا الشي اللي ما تسوقوش له براكنة وما لعبوش الماتش تطبيقا لقرار الكاف.
وخرجو قبل لحظات نهضة بركان كيعبرو على الشكر للمغاربة فگاع ربوع المملكة المغربية، ونشرو فمواقع التواصل التجتماعي صورة لخريطة المغرب من طنجة حتى لگويرة، تحت شعار “الله-الوطن-الملك”وقالو:شكرا للشعب المغربي من طنجة الغالية إلى الكويرة العزيزة على تضامنه مع فريقنا”.
وعرفت الثلاثة ايام اللي فاتت حملة تضامن كبيرة من المغاربة مع نهضة بركان، ملي وصل الفريق المغرب للجزئر وحجز عسكر الكابرانات على التونيات ديال النهضة فمطار هواري بومدين حتى رجع إلى المغرب، بعد الغاء الماتش بقرار من الكاف، وتم استقبال نهضة بركان فمطار وجدة استقبال الابطال من طرف المغاربة، احتفالا بالفريق حيث بقى متشبث بالموقف البطولي والوطني ديالو، رغم مضايقات الكابرانات.
