كود مراكش//

نايضة فمراكش بسبب الماء اللي تقطع على المدينة، من الليلة الماضية ومستمر حتى لدابا من اليوم الاثنين، والمواطنين مقلقين بزاف بسبب هذا الشي خصوصا وانه جا فرمضان.

وعلنت الوكالة المستقلة لتوزيع الماء والكهرباء بمراكش فبلاغ لها أن منشأة إنتاج الماء الصالح للشرب التابعة للمكتب الوطني للماء والكهرباء شعبة الماء قد تعرضت لبعض الإضطرابات وفي هذا الصدد ستشهد شبكة التوزيع التابعة للوكالة المستقلة (راديما) انخفاضا في صبيب الماء قد يصل في بعض الأحيان إلى الإنقطاع في التزويد في جميع أحياء المدينة.

وحسب ما توصل به موقع “گود” فالمواطنين فمراكش كاعيين بزاف بسبب الماء اللي تقطع عليهم، وراه مشاو كيشريو الماء من الحوانت باش يشربو ويطيبو ويوجدو لفطور ويغسلو، وما عارفينش حتى لاي وقت غيستمر هذا الإنقاط ديال الماء فالمدينة اللي كتعتبر قطب سياحي عالمي، وبحال هذا المشاكل ديال الماء اللي تقطع يقدر يؤثر على الأسهم ديالها كوجهة سياحية مفضلة عند بزاف ديال السياح اللي كيجيو لها من مختلف أنحاء العالم.