كود هناء ابو علي ///
نايضة بزاف فالصبليون على خواتات ملك اسبانيا فيليبي السادس. وعلاش؟ هاد الاميرات مشاو يشوفو باهم خوان كارلوس فابوظبي شهر فبراير. تماك دارو الڤاكسان. جريدة “ال كونفيدانسيال” الاسبانية فرشاتهم وهي تنوض ازمة فالصبليون.
الحكومة بمكوناتها: اليسار “بي سو وي” واليسار الراديكالي بوديموس” اعتابرو هاد الشي اهانة للصبليون. وزيرة العمل الاشتراكية قالت باللي هاد الشي قبيح بزاف وباللي كان على هاد الاميرات يكونو قدوة.
بوديموس هاجمات الملكية. لقاتها فرصة باش تزيد طالب بنظام جمهوري. حتى سيودودانوس المعارض اعتبر هاد الشي ما مزيانش.
القصر الملكي الاسباني قال باللي خواتات الملك ما بقاوش اعضاء افراد العائلة الملكية لقراب من 2014.
دابا كاين الجمهوريين فالصبليون طلبو استدعاء رئيس الحكومة الاسباني يجي للبرلمان يهدر على هاد اللقاح وعلى فضايح الملك واتهاماتو بتلقي الرشوة
هاد الشي جا خسر صورة الملكية اللي كتعاني من فضايح كثار فالجارة الشمالية.
وشوفو غير على جوج فاكسان اش وقع. حنا فالمغرب ناضو سياسيين وبرلمانيين منهم رؤساء اندية كبيرة ومشاو قبل من كلشي دارو الڤاكسان فالسفارة الاماراتية وما هدر معاهم حد. كلشي جاه هاد الشي عادي.
دابا كيهدرو على اكثر من 4 الاف مغربي دار الفاكسان عند الاماراتيين. هادي راها فضيحة كبيرة. هادو راه ولاءهم للامارات ماشي للمغرب.
