كود سلا//

لا حديث وسط نساء التعليم بسلا الا على واقعة اقتحام بوليسية بإعدادية الامام علي.

https://fb.watch/iPF05mBRT9/?mibextid=cr9u03

من بعد ثلاث ايام شغيلة التعليم بمديرية سلا حسات بالحكرة وما خسرت على طاقم إداري وتربوي على قدو حتى بلاغ باش يحسوا راهم خدامين مع الدولة زعما.
علاش سكتات الأكاديمية الجهوية و المديرية الإقليمية و الوزارة. واش حيث بطلة الاعتداء بوليسية.
واش الأولوية لحماية المرفق العمومي و لا التطبيع مع اعتداءات موظفين عمومين من عينة خاصة.

ناس التعليم حسوا بان الحكرة هي الاصل، و أن الوزارة مرة مرة كدير الهدى على شي مرا و لا شي راجل معندو سند وغي سخن عليه راسو، وكيخرجوا البيانات ويخرجوا العينين و المتابعة القضائية وديك الهدرة الكبيرة.

أما ملي تدخل بوليسية حتا القسم وتجمع أستاذ قدام تلامذو بنص، وتقتحم قاعة الأساتذة بحال اي مشرمل وتعربط على 30 استاذ و إداري وتكملها بالكلام الخاسر و التهديد، فالامر يحتاج للتريث.
هاذ الاحساس ديال الحكرة والدونية، هرسوا بيان ديال المديرية العامة للأمن الوطني اللي فتحات تحقيق في الموضوع وهذا احد ذاتوا انتصار لمعرفة حقيقة ما جرى وترتيب الإجراءات القانونية بغض النظر عن الفاعل.

تقدر ام التلميذ على حق، لكنها تصرفت كشرطية وليست كأم هاذ الشي خلا حرمة المؤسسة لا تساوي شيء وقلق الأساتذة، خصوصا مع تدخل كوموندو امني لاخراج البوليسية من المدرسة و الضغوط اللي تمارسات على الاستاذ باش يتنازل ويسمح و اللي كيقولوا ان المدير الإقليمي دارها على الاستاذ في غياب رواية دقيقة فهاذ القضية.

هاذ القضية مازال عندها تبعات وغدا تحكم الى حد كبير مناخ التواصل داخل المؤسسات التعليمية يا اما يخدموا بكرامة يا إما يحولوا المؤسسات الساحات حرب مع الغرباء.