كود الرباط//

جولة ميكرو “كود” فالعاصمة الرباط حول الانتخابات وتوقعات المغاربة، عدد من المواطنين للي تلاقيناهم باغي تغيير ومبقاوش باغين تعاود طلع العدالة والتنمية لرئاسة الحكومة.

مواطنة وباحثة في العلوم السياسية قالت لـ”كود” انتظاراتنا كثيرة كمواطنين من هاد الحكومة للي غاتجي، هاد المسؤولين اللي غايطلعو خصهم يخدمو وينزلو برامج تنموية، وهذا تكليف وماشي تشريف. عندنا حاجات زوينين فبلادنا لذلك خصنا ناس مسؤولين يخدمو”.

مواطن آخر قال لـ”كود” :”هادي 10 سنين هادي وناس شادين سوارت ورجعو ثاني جايين كيقولو غانديرو ليكم ثاني.. ولا كنتو درتو غير لراسكم، انا معنديش ثقة فحتى واحد”.

مواطنة اخرى قالت لـ”كود” :”صراحة بعد جوج ولايات ديال العدالة والتنمية، كنا متوقعين بانهم مداروش فالولاية الاولى كنا متنظرينها قلنا الولاية الثانية يقدرو يداركو الامر ويديرو اصلاحات لي ناس كيتسناوهم ف الصحة والتعليم والشغل والبيئة بزاف ديال المجالات محتاجين للاصلاح. وبما أنه مادرو حتى حاجة خاص البديل”.

مواطن آخر انتقد بشدة تدبير العدالة والتنمية لجوج ولايات، وقال بانه كيتوقع الاحرار يجي لول. وخاص حلول لمواجهة الفقر.