عفراء علوي محمدي- كود//

من بعد ما طاح ثمن الحولي فهذ السيمانة اللخرا، بسباب أزمة كورونا والقرار الأخير ديال وزارة الداخلية، اللي قللات الطلب على الحوالة، الأضاحي رجو يغلاو من جديد، واليوم السوق شعلات.

والناس مابقاو لقاو ما يشريو، والحولي اللي كان كيدير هذي أربعة أيام 1600 درهم رجع كيدير 2800 درهم.

لكن فمناطق خرى مزال رخيص، كسابة تكلمات معاهم “كود” قالو أن هذشي راجع لقلة الطلب وكثرة العرض، اللي ناتجة على أن القدرة الشرائية عند الناس اللي مابقاتش كيف كانت بسبب كورونا، حيت كاين بزاف اللي كَالسين من الخدمة، وحتى فالمناسبات اللي كانو الناس يشريو فيها الحوالا بحال السبوع والختانة تلغات فهذ الأزمة، وولات الوفرة فالأضاحي.

ومع هذ الأزمة، كاين مجموعة من المواطنين كيفضلو يشريو الحولي قبل ليلة العيد بنهار، او فصباح العيد نيت، حيت كيرخاص ثمنو أكثر.